Regnum-ի գլխավոր խմբագիրը պատմել է Բաքվում Ռուսական տունը փակելու մասին գրառումից հետո ստացած սպառնալիքների մասին

«Regnum» լրատվական գործակալության գլխավոր խմբագիր, գրող, լրագրող, Մարդու իրավունքների խորհրդի անդամ Մարինա Ախմեդովան պատմել է այն սպառնալիքների և անպարկեշտ վիրավորանքների մասին, որոնք ստացել է Բաքվում «Ռուսական տան» փակման մասին Telegram-ում իր գրառումից հետո։

«Երեկ՝ գիշերվան մոտ, սկսեցի սպառնալիքներ ստանալ։ Առաջինը ստացա մի օգտահաշվից, որն անվան փոխարեն ուներ բազմակետ («…»): Դրա հեղինակն ինձ հորդորեց հանգիստ թողնել ադրբեջանցիներին, թե չէ կզղջամ։

Ավելի վաղ, օրվա ընթացքում ես կարճ գրառում էի արել՝ իմ արձագանքը գրանցման բացակայության պատճառով Բաքվում «Ռուսական տան» փակմանը, որը, ի դեպ, Ռուսաստանը երբեք չկարողացավ ձեռք բերել՝ չնայած իր բոլոր ջանքերին։ Ես առաջարկեցի նմանատիպ մոտեցում ցուցաբերել Մոսկվայում Ադրբեջանի ներկայացուցչությանը` «Սադովոդին» և «Ֆուդսիթիին»: Արդեն այդ գիշեր նույնանման հաղորդագրություններ լցվեցին իմ անձնական համարի վրա՝ ինձ անվանում էին «ռուս խոզ»։ Ուղերձներից մեկում գրված էր. «Ա՛յ աղջիկ, ընդհանրապես մի՛ հիշատակիր Ադրբեջանը, դա քեզ համար վատ կավարտվի»։ Մեկ ուրիշում ինձ անվանեցին մանքուրթ, որը չգիտի իր լեզուն։ Թեև ես ի ծնե ռուսախոս եմ և որևէ կապ չունեմ Ադրբեջանի հետ, ինչը ոչ լավ է, ոչ վատ, պարզապես չունեմ: Երրորդ ուղերձում ասվում էր. «Լռիր Ադրբեջանի մասին, հակառակ դեպքում ծնողներիդ հետ կզոհվես», – պատմել է Ախմեդովան:

Ըստ նրա, ինքը նաև սկսել է փոստով նամակներ ստանալ հետևյալ տեքստով. «Ողջույն քեզ, ռուս խոզ։ Ադրբեջանի համար շուտով կոկորդդ կկտրեն».

«Դե, հետո ինչ-որ բան նկատելիորեն փոխվեց այլ ուղարկողների հաղորդագրությունների տրամադրության մեջ: Նրանք ինձ ուղարկեցին մի աղջկա լուսանկար և ավազահարթակը, որտեղ նա զոհվել էր։ Դա Դոնեցկում էր, նա սպանվել էր Ուկրաինայի զինված ուժերի արկից։ Անմիջապես կռահեցի, որ այդ երեխան Հրեշտակների ծառուղուց է։ Լուսանկարն ուղեկցվում էր զոհված աղջկա հասցեին ուղղված կեղտոտ խոսքերով և ինձ համար նույն ճակատագրի խոստումներով։

Ուղերձների այս ալիքում ես արդեն կասկածեցի Ուկրաինայի միջամտությանը. նրա հատուկ ծառայությունները միշտ ուրախ են իրենց ազգային օրակարգը բերել մեր երկիր: Սկզբունքորեն, միայն սրա վրա են հույսը դնում․ մեզ ռազմաճակատում հնարավոր չէ հաղթել, ողջ հույսը ազգամիջյան ջարդի վրա է։ Եվ պատկերացրեք, թե որքան լավ կլինի նրանց համար, եթե ես տեղադրեմ զոհված երեխայի սքրինշոթը և գոռամ, որ դա ինձ ուղարկում են Ադրբեջանի ներկայացուցիչները։ Բայց ես դա չարեցի»,- ասել է Ախմեդովան։

Ըստ նրա, Ռուսաստանի նախագահին կից Մարդու իրավունքների խորհրդում ինքը իր գործընկեր Կիրիլ Կաբանովի հետ աշխատում են միգրացիոն հարցերի շուրջ, իրենց շնորհիվ բազմաթիվ հարցեր են բարձրացվել։

«Այդ թվում՝ սփյուռքի հարցերը, որոնք ես համարում եմ անօրինական կազմավորում։ Այսօր Կաբանովն ինձ հարցրեց. «Շարունակելո՞ւ ես զբաղվել միգրացիայի հարցերով»: «Դե, իհարկե,- պատասխանեցի ես:- Կզբաղվեմ և կարծում եմ, որ դա ճիշտ է, քանի որ մենք ոչ թե փորձում ենք ոտնահարել միգրանտների իրավունքները, այլ, ընդհակառակը, ուզում ենք կարգավորել նրանց հոսքը դեպի մեզ, որպեսզի գործատուին ինքնաբերաբար ստիպենք հարգել նրանց աշխատանքային իրավունքները։

Այո, իհարկե, ես կշարունակեմ աշխատել այս թեմայով, թեև այսօր բավականին դժվար էր կենտրոնանալ աշխատանքի վրա, իսկ ուրբաթ օրը այն օրն է, երբ մեր խմբագրության բոլոր տեքստերը՝ վերլուծություններ, ռեպորտաժներ, սյունակներ, տպագրվում են միայն իմ կարդալուց հետո։ Անընդհատ զանգեր ու հաղորդագրություններ էի ստանում իմ Telegram-ի օգտահաշվով։ Համարներն, իհարկե, թաքցված էին։

Երբ սպառնալիքները չափն անցան, անհրաժեշտ և ճիշտ համարեցի դիմել Քննչական կոմիտեին։ Եվ հիմա թող նա պարզի, թե ով է օգտագործել երեխայի լուսանկարը և սպառնացել ինձ։ Իսկ ես չեմ էլ փորձի գուշակել։

Երեխայի համար ինձ վիրավորված եմ զգում. անգամ նրա մահից հետո նրան հանգիստ չեն տալիս։ Դոնեցկի Հրեշտակների ծառուղին շարունակում է թիրախ մնալ, քանի որ դա ամենահիվանդագին ապացույցն է, թե ինչի է ընդունակ չարը։ Իսկ քրեական գործը հարուցված է, և ես ակնկալում եմ, որ չարը կպատժվի»,- նշել է Regnum լրատվական գործակալության գլխավոր խմբագիրը։