«Նիկոլի այս գործելաոճը՝ ոստիկանների հետևում թաքնվելը, խոսում է Նիկոլի թույլ իշխանության, քաղաքական պարտությունը արձանագրված լինելու մասին». Հենրիխ Դանիելյան
ՀՀԿ ԵԿ նախագահ Հենրիխ Դանիելյանը, ով նույնպես երեկ վնասվել էր Բաղրամյան պողոտայում ոստիկանների կողմից կիրառված լուսաձայնային նռնակներից, ֆեյսբուքյան իր էջում գրում է. «Ժողովրդավարության բաստիոնում ոստիկանները, որոնց առաքելությունը սեփական ժողովրդին պաշտպանելն է, այնպիսի լուսաձայնային նռնակներ են նետում ցուցարարների վրա, որոնք օգտագործվում են միայն զինված հանցագործների դեմ։
Ոստիկանները համարձակվում են ցանկացած միջոց կիրառել խաղաղ ցուցարարների դեմ, առանց պատճառի հարվածներ հասցնել, խոշտանգել մարդկանց և իրենց հանցագործ գործողությունները որակել օրենքի տառին համապատասխան և պաշտպանել միայն մեկ մարդու։
Նիկոլի այս գործելաոճը՝ ոստիկանների հետևում թաքնվելը, խոսում է նիկոլի թույլ իշխանության, բոլոր ուժային կառույցները որպես իշխանության ապահովվման միջոց օգտագործելու և քաղաքական պարտությունը արձանագրված լինելու մասին։
Պայքարը շարունակելու համար ոչ մի խոչընդոտ չի կարող լինել, մենք ոչնչից չենք վախեցել ու չենք վախենում։ Արձանագրենք նաև, որ Հայի դեմ պայքարող դավաճանը ոչ մի հրաման չի տվել թշնամու առաջխաղացումը կանխելու համար։
Հոգնել չկա՛, վախենալ չկա՛, նահանջել չկա՛»։
