Հաքան Ֆիդանը, որպես Թուրքիայի արտգործնախարար, առաջին անգամ կայցելի Չինաստան
Թուրքիայի արտգործնախարար Հաքան Ֆիդանը Չինաստանի արտգործնախարար Վան Իի հրավերով երկուշաբթի կայցելի Չինաստան, հայտնում է Անադոլու գործակալությունը՝ վկայակոչելով դիվանագիտական աղբյուրները։
Սա Ֆիդանի առաջին այցն է Չինաստան՝ որպես արտաքին գործերի նախարար, պաշտոնը նա ստանձնել է անցյալ տարվա հունիսին։ Վանը Թուրքիա էր այցելել անցյալ տարվա հուլիսին։
Եռօրյա այցի ընթացքում ակնկալվում է, որ Ֆիդանը կհանդիպի փոխնախագահ Հան Չժենի և Չինաստանի Կոմունիստական կուսակցության կենտրոնական կոմիտեի քաղբյուրոյի անդամ, քաղաքական և իրավական հարցերի հանձնաժողովի ղեկավար Չեն Վենցինի հետ։
Ֆիդանը հանդիպում կունենա նաև Չինաստանում բնակվող Թուրքիայի քաղաքացիների հետ։ Սպասվում է, որ Պեկինում հանդիպումներից հետո նա հունիսի 4-5-ը կայցելի Ուրումչի և Քաշգար:
Ֆիդանի այցը Սինցզյան-Ույղուրական ինքնավար շրջան կլինի Թուրքիայի ամենաբարձր մակարդակի այցը այն ժամանակվա վարչապետ Ռեջեփ Թայիփ Էրդողանի՝ 2012 թվականի ապրիլին տարածաշրջան այցելությունից հետո:
Վերջերս Թուրքիան քայլեր է ձեռնարկել Չինաստանի բոլոր շրջանների հետ հարաբերություններն ամրապնդելու համար։ Այս համատեքստում Անկարան ուժեղացրել է իր դիվանագիտական ներկայությունը Չինաստանում՝ Պեկինում իր դեսպանատանը և Գուանչժոուում, Շանհայում և Հոնկոնգում իր հյուպատոսություններին ավելացնելով անցյալ տարի Չենդուում բացված գլխավոր հյուպատոսությունը, հաղորդում է թուրքական լրատվամիջոցը:
