Թուրքիայի երիտասարդները թանկացումների դեմ բոյկոտ են սկսում
Թուրքական մեդիայում լայնորեն տարածվում են լուրեր, որոնց համաձայն՝ մի խումբ երիտասարդներ մտադիր են բողոքի ակցիա անցկացնել երկրում օր օրի ահագնացող թանկացումների և հատկապես ժամանցի վայրերում ուտելիքի գների թանկացումների դեմ: Այս մասին տեղեկացնում է ermenihaber.am-ը։
Նշվում է, որ նրանք սոցցանցերում կոչ են արել իրենց հայրենակիցներին ապրիլի 20-ից 21-ը չօգտվել սրճարաններից և ռեստորաններից:
Բողոքի ակցիան հանրության շրջանում հասցրել է տարածվել հետևյալ ձևով. «Բոյկոտ. շաբաթավերջին սրճարաններ և ռեստորաններ մի գնացեք»:
Տեղեկություններ կան, որ մի շարք հանրային ճանաչում ունեցող մարդիկ պատրաստվում են միանալ բողոքի ակցիային:
Մի շարք քաղաքացիներ հիմնականում X-ի (Twitter) իրենց էջերում կատարած գրառումներով աջակցությունն են հայտնել նախատեսվող բոյկոտին:
Ակցիայի վերաբերյալ գրառումները զուգակցվում են #fahisyemeğeBOYKOT (բոյկոտ չափազանց թանկ/անհամաչափ սնունդի դեմ) հեշթեգով:
