Սրտաբանը բացատրել է, թե ինչ ախտանիշներով կարելի է ճանաչել մոտալուտ ինֆարկտը
Կրծքավանդակում սեղմող ցավն ու այրումը, ինչպես նաև շնչահեղձության զգացումը անգինա պեկտորիսի (կրծքային հեղձուկ) ախտանիշներ են, որոնք սովորաբար անհետանում են դեղամիջոցն ընդունելուց 10-20 րոպե հետո։
Սակայն եթե դրանք երկար ձգվեն, և հաբերը դադարեն օգնել, ապա սա նախաինֆարկտային վիճակի նշան է, զգուշացնում է սրտաբան, բ.գ.թ. Լեոնիդ Վորսլովը: Պետք է մտահոգվել նաև, եթե մարդն իր կյանքում առաջին անգամ է անգինայի նոպա ունենում, ըստ shantnews-ի՝ նշել է նա Հանրային լրատվական ծառայության հետ զրույցում։
Սրտամկանի ինֆարկտը կարդիոմիոցիտների նեկրոզ է, այլ կերպ ասած՝ պոմպային ֆունկցիայի համար պատասխանատու սրտի մկանային բջիջների մահ։ Նրանց մահվան պատճառով արյունն ու թթվածինը չեն հոսում դեպի սիրտ։ Նախաինֆարկտային վիճակում, որն առաջանում է բջիջների մահից առաջ, զգացվում են անգինա պեկտորիսի ախտանիշներ։
«Սա սուր ցավ է կրծքավանդակում՝ այրվածք, ճնշում, օդի պակասի զգացում: Երբեմն դրանք տարածվում են դեպի ուսը կամ ձեռքը, բայց առաջին հերթին ցավում է կրծոսկրի հետնամասը։ Սա ցույց է տալիս, որ սիրտը բավարար թթվածին չի ստանում»,- բացատրել է բժիշկը։
Եթե նիտրոգլիցերին ընդունելուց հետո ախտանշանները չեն անհետանում 20 րոպեի ընթացքում, ապա դա վկայում է վտանգավոր վիճակի մասին, որը կարող է հանգեցնել սրտի կաթվածի, ընդգծել է սրտաբանը։
«Սա կոչվում է նոր սկսվող անգինա, և պետք է զգուշությամբ վերաբերվել դրան: Շատ հաճախ առաջին անգամ ինֆարկտների դրսեւորումն ավարտվում է սրտի կաթվածով»,- պարզաբանել է Վորսլովը։
Նման ախտանիշների առկայության դեպքում դուք պետք է պառկեք, խմեք նիտրոգլիցերին կամ վալիդոլ և շտապօգնություն կանչեք: Բժիշկները հիվանդից էլեկտրասրտագրություն կկատարեն և կորոշեն հետագա բուժումը, եզրափակել է սրտաբանը։
