Արևմուտքը գիտակցաբար բաց է թողել Պուտինի խոսքերը միջուկային զենք չկիրառելու մասին. Պեսկով
Ռուսաստանի նախագահի մամուլի քարտուղար Դմիտրի Պեսկովը, խոսելով ՌԴ նախագահ Վլադիմիր Պուտինի՝ լրագրող Դմիտրի Կիսելյովին տված հարցազրույցի վերաբերյալ Սպիտակ տան արձագանքի մասին, նշել է, որ Արևմուտքում գիտակցաբար բաց են թողել են ՌԴ նախագահի խոսքերն այն մասին, որ նրա մտքով չի անցել հատուկ ռազմական գործողության ընթացքում մարտավարական միջուկային զենք օգտագործել:
Ավելի վաղ Սպիտակ տան պաշտոնական ներկայացուցիչ Կարին Ժան Պիեռը հայտարարել էր, որ ԱՄՆ նախագահ Ջո Բայդենը տեղեկացված է լրագրող Կիսելյովին Պուտինի տված հարցազրույցի մասին, միջուկային ուժերի մասով հայտարարությունները Վաշինգտոնում անպատասխանատու են համարում:
«Փաստացի, Պուտինի կողմից միջուկային զենքի կիրառման մասին ոչ մի սպառնալիք այդ հարցազրույցում չի հնչել։ Նա նախ պատասխանում էր լրագրողի հարցերին, և կային հենց լրագրողի հարցեր, այլ ոչ թե ինչ-որ հատուկ հայտարարություններ։ Եվ նախագահը հենց խոսել է այն պատճառների մասին, որոնք կարող են անխուսափելի դարձնել միջուկային զենքի կիրառումը։
Սրանք այն պատճառներն են, որոնք նշված են մեր համապատասխան փաստաթղթերում, որոնք հայտնի են ամբողջ աշխարհում: Ավելին, օրինակ, Արևմուտքում բոլորը գիտակցաբար բաց են թողել այն խոսքերը, որ նրա մտքով երբեք չի անցել կիրառել, օրինակ, մարտավարական միջուկային սպառազինություն՝ չնայած տարբեր իրավիճակներին, որոնք ստեղծվել են ռազմական գործողությունների ընթացքում։ Հետևաբար, այո, դա համատեքստի միտումնավոր աղավաղում է և նախագահ Պուտինին լսելու ցանկության բացակայություն: Դրանում կրկին ոչ մի նոր բան չկա։ Դա մի բան է, որը մենք շատ կենտրոնացված կերպով դիտարկել ենք վաղուց և հատկապես՝ վերջին երկու տարիներին», – ասել է Պեսկովը։
Պուտինը Կիսելյովին տված հարցազրույցում ավելի վաղ հայտարարել էր, որ ՌԴ-ն պատրաստ է միջուկային պատերազմի, սակայն նման հնարավորության մասին ասել էր. «Չեմ կարծում, որ ամեն ինչ նման առճակատման է գնում»։ ՌԴ նախագահի խոսքով՝ երկիրը պատրաստ է միջուկային զենք կիրառել այն դեպքում, եթե խոսքը ռուսական պետության գոյության մասին է:
