«Ալիևն այժմ իր հոր դիակի հետ է մրցում». Հոգեբանը՝ Ալիևի արցախյան գաստրոլների մասին

Այսօր, առավել քան երբևէ, ադրբեջանական կողմից ակտիվացել են հոգեբանական գրոհները հայ հանրության ուղղությամբ. Բաքվի բռնապետի գաստրոլները հայկական Արցախում այդ շղթայի մի դրվագն են միայն:

Հոկտեմբերի 15-ին Ալիևն իր երկրի դրոշն էր բարձրացրել Արցախի  մայրաքաղաք Ստեփանակերտում, իսկ Արցախի դրոշը գետնին էր նետել:  Նա հատուկ իր ժողովրդի համար ելույթում վստահեցրել էր. «Ադրբեջանցի ժողովուրդն այնպիսի հաղթանակ նվաճեց, որը հավերժ կմնա մեզ հետ»: Ի դեպ, հոկտեմբերի 15-ը պատահական չէր ընտրվել. 20 տարի առաջ հենց այդ օրը Իլհամը հորից՝ Հեյդար Ալիևից ստացել էր իշխանությունը։

Հոգեբան Իրինա Ծատուրյանի գնահատմամբ, Արցախի կորստից հետո հայ հանրությունը, առհասարակ,  հոգեբանական լրջագույն խնդիրների է բախվել: 168.am-ի հետ զրույցում նա ցավով արձանագրեց՝ այժմ վիճակը շատ ծանր է:

«Այն, ինչ հիմա է կատարվում, մենք իսկապես դրա նախադեպը չունենք»,- հավելեց նա:

Արցախում Ալիևի ցուցադրական շոուները մասնագիտական վերլուծության ենթարկելով՝ Իրինա Ծատուրյանը նկատեց՝ նա իրեն դրսևորում է՝ իբրև հաղթող, բայց չի հասկանում, որ  ինչ-որ ժամանակ հետո իրավիճակը կարող է փոխվել:

«Թող աշխարհի հանրությունը նաև տեսնի, թե ում հետ գործ ունի. դրոշը ոտնահարելն արդեն բնութագրում է իրեն, և ողջախոհ ուժերը դրա գնահատականը տալիս են:

Մենք պետք է հասկանանք, որ սադրանքների չպետք է ենթարկվենք, որովհետև մեր տարածաշրջանը շարունակում է մնալ շատ պայթյունավտանգ, և այդ ամենն արվում է, որ Հայաստանն էլ հայաթափվի:

Ադրբեջանական ալիքներով այսօր այնպիսի հակահայկական ալիք է գնում, բայց մեր ռեակցիայից շատ բան է կախված (հոգեբանության մեջ ամեն ինչ գալիս է ռեակցիայից). ես կարող եմ հասկանալ, որ դա սադրանք է, բայց կարող եմ բարկանալ, մազապուրծ թողնել-գնալ: Երկրորդն անել պետք չէ. հոգեբանական գրոհ է, բայց մենք պետք է հիշենք, որ քրիստոնյա ենք»,- վստահեցրեց մասնագետը:

Ի դեպ, Իրինա Ծատուրյանի մասնագիտական գնահատմամբ՝ Ալիևի այս վարքի մեջ հոր հետ հարաբերությունների հոգեբանական խնդիրն է:

«Ինձ մոտ անընդհատ այն տպավորությունն է, որ նա իր և իր հոր հարաբերությունների «մուռն է հանում».  հայրը չկարողացավ, իսկ ինքը կարողացավ:

Այսինքն՝ ինքն իր հոր դիակի հետ է հիմա մրցում՝ դու չկարողացար, ես կարողացա»,- ասաց նա:

Բռնի տեղահանության ենթարկված արցախահայության հոգեբանական խնդիրներին անդրադառնալով՝ մասնագետը նշեց, որ այսօր նրանք հոգեբանական ամենատարբեր խնդիրներն ունեն:

«Այդ մարդիկ կորցրել են ամեն ինչ. մենք այստեղ մի փոքր կորուստ ենք ունենում, անընդհատ մտածում ենք՝ ինչ եղավ, իսկ իրենք կորցրել են ամեն ինչ.  եկել են մի անձնագրով: Իրենք չեն պատկերացնում՝ ինչպես կլինի, նաև, կարծեք, ժամանակավոր են իրենց Հայաստանում տեսնում (այս մասին թեև չեն բարձրաձայնում, բայց  ինձ մոտ այդ տպավորությունն է ձևավորվել)»,- իր շփումներից ստացած տպավորությունները ներկայացրեց հոգեբանը՝ խորհուրդ տալով առավել ըմբռնումով մոտենալ բռնի տեղահանված մեր հայրենակիցների հանդեպ,- Հոգեբանության մեջ քրիստոնեությանը հարող մի շատ լավ մոտեցում կա՝ «տեղերով փոխվենք». եթե մենք լինեինք այդ վիճակում, մենք մեզ ինչպե՞ս կպահեինք»