«Չեմ կարծում, թե նախագահ Ալիևը կցանկանա հայտնվել նույն իրավիճակում, ինչ նախագահ Պուտինը, և համարվել միջազգային ահաբեկիչ, ագրեսոր». Անդերս Ֆոգ Ռասմուսեն
«Կոչ եմ անում Իլհամ Ալիևին վերացնել Լաչինի միջանցքի շրջափակումը»,- այս մասին այսօր Ջերմուկում լրագրողների հետ ճեպազրույցում ասաց ՆԱՏՕ-ի նախկին գլխավոր քարտուղար, Դանիայի նախկին վարչապետ, «Գլոբալ Ռասմուսեն» քաղաքական խորհրդատվական միջազգային կազմակերպության հիմնադիր ղեկավար Անդերս Ֆոգ Ռասմուսենը՝ անդրադառնալով իր հայաստանյան այցի մանրամասներին:
Նա տեղեկացրեց, որ առաջին անգամ Հայաստան այցելել է 2012 թվականին՝ որպես ՆԱՏՕ-ի գլխավոր քարտուղար:
Ըստ նրա, շատ բաներ են փոխվել դրանից հետո Հայաստանում: Ռասմուսենը հիշեցրեց, որ նախօրեին հանդիպել է Նիկոլ Փաշինյանի, ԱԳ և Պաշտպանության նախարարների հետ: «Ես այստեղ եմ ՀՀ կառավարության հրավերով, որպեսզի օգնեմ Կառավարությանն ամրապնդել կապերը ԵՄ-ի և ընդհանուր առմամբ Արևմուտքի հետ: Երեկ հանդիպումներ եմ ունեցել Երևանում, իսկ այսօր այցելել եմ ՀՀ հարավային մարզեր, որպեսզի իմ աչքով տեսնեմ Ադրբեջանի ագրեսիայի հետևանքները Հայաստանի վրա: Ես այցելեցի Ջերմուկ քաղաք, և քաղաքապետն ինձ ասաց, թե ինչպիսի հսկայական ազդեցություն են ունեցել Ադրբեջանի հարձակումները քաղաքի և քաղաքի տուրիզմի վրա:
Ավելի վաղ այսօր այցելել էի Լաչինի միջանցք: Ինչպես գիտեք, Լաչինի միջանցքը միակ կապն է Հայաստանի ու ԼՂ հայ բնակչության միջև: Անցյալ տարվա դեկտեմբեր ամսից Հայաստանի և ԼՂ-ի միջև ճանապարհը շրջափակված է, այս շրջափակումն անմարդկային ու ապօրինի է: Ես հանդիպեցի մարդկանց հետ, ովքեր ապրել են ԼՂ-ում, և նրանք ինձ պատմեցին այն ծայրահեղ իրավիճակի մասին, որը տիրում է ԼՂ-ում:
Շրջափակում՝ նշանակում է, որ պարեն կամ դեղորայք կարելի է շատ փոքր քանակով հասցնել ԼՂ, որը նշանակում է պարենի և կյանքի համար անհրաժեշտ դեղորայքի պակաս ԼՂ-ում: Մենք բախվում ենք հումանիտար ճգնաժամի, որը կարող է վերածվել հումանիտար աղետի:
Այս շրջափակումն անօրինական է:
Մի քանի շաբաթ առաջ Արդարադատության միջազգային դատարանը որոշում է կայացրել, որով պարտադրում է Ադրբեջանին ապահովել անխոչընդոտ տեղաշարժ Լաչինի միջանցքով:
Որոշումը պարտադիր է, որը նշանակում է, որ Ադրբեջանը պարտավոր է բացել միջանցքը ազատ հասանելիության և տեղաշարժի համար: Այսօր ես հստակ ուղերձ եմ հղում Ադրբեջանի նախագահ Ալիևին և ասում եմ՝ վերացրու շրջափակումն այսօր անհապաղ»,- ասաց Ռասմուսենը:
Ըստ նրա՝ ԵՄ-ն պետք է առավել ճնշում գործադրի Ադրբեջանի նկատմամբ:
«ԵՄ-ն Ադրբեջանի հետ էներգետիկ ոլորտի համաձայնության է եկել, որը կարող է օգտագործվել՝ որպես հարթակ կրիտիկական երկխոսության համար Ադրբեջանի իշխանությունների հետ: Միգուցե նախագահ Ալիևը, ինչպես նախագահ Պուտինը, ավտորիտար է, բայց չեմ կարծում, թե նախագահ Ալիևը կցանկանա հայտնվել նույն իրավիճակում, ինչ նախագահ Պուտինը, և համարվել միջազգային ահաբեկիչ, ագրեսոր: Ուստի ևս մեկ անգամ ես կոչ եմ անում նախագահ Ալիևին՝ վերացնել շրջափակումը»,- ասաց Ռասմուսենը:
