Ոստիկանության հերթական պարտությունը. Դատարանը մերժել է զոհված զինվորի հորը պատասխանատվության ենթարկելու հայցը
Վարչական դատարանը մերժել է 2022 թվականին «Եռաբլուր» զինվորական պանթեոնում տեղի ունեցած միջադեպի վերաբերյալ 44-օրյա պատերազմում զոհված Մխիթար Գալեյանի հորը՝ Գարիկ Գալեյանին պատասխանատվության ենթարկելու Ոստիկանության հայցը:
Ոստիկանությունը դատարանին ներկայացրած հայցով պահանջում էր Գարիկ Գալեյանին ենթարկել պատասխանատվության Վարչական իրավախախտումների մասին ՀՀ օրենսգրքի 182-րդ հոդվածի պահանջով, այն է՝ Ոստիկանության զորքերի զինծառայողի կամ ոստիկանության ծառայողի օրինական պահանջը չկատարելը, որը պատժվում է սահմանված նվազագույն աշխատավարձի հիսնապատիկի չափով։
Հատկանշական է, որ Ոստիկանության ներկայացուցիչը երկու դատական նիստերին էլ չէր ներկայացել:
Փետրվարի 15-ին՝ երկրորդ դատական նիստի ավարտին դատարանը հայտարարեց, որ դատական ակտը կհրապարակվի 2023 թվականի մարտի 7-ին:
Հիշեցնենք, որ 44-օրյա պատերազմում զոհված զինծառայողների ծնողները 2022 թվականի սեպտեմբերի 20-ից հերթապահություն էին իրականացրել «Եռաբլուր» զինվորական պանթեոնում, որպեսզի հաջորդ օրը՝ սեպտեմբերի 21-ին՝ ՀՀ անկախության 31-րդ տարեդարձի կապակցությամբ, վաղ առավոտյան, գաղտագողի տղաների շիրիմներին այցելող և ծաղիկներ խոնարհող Փաշինյանի և նրա թիմակիցների մուտքն արգելեին։
Սակայն ոստիկանության աշխատակիցները բռնի ուժ կիրառելով և մարմնական վնասվածքներ հասցնելով՝ բերման էին ենթարկել զոհված զինծառայողների ծնողներին, այդ թվում՝ մայրերին, ինչից հետո Փաշինյանն իր թիմակիցների հետ մտել էր պանթեոն։
