Հայոց ցեղասպանության մասին թուրք ընդդիմադիր պատգամավորի գրառումը` սկանդալի պատճառ
Թուրքիայում գլխավոր ընդդիմադիր քաղաքական ուժ համարվող «Ժողովրդահանրապետական» կուսակցության պատգամավոր Սեզգին Թանրըքուլուն Twitter-ում գրառում է արել Հայոց ցեղասպանության վերաբերյալ։ Այս մասին տեղեկացնում է ermenihaber.am-ը։
Թուրք պատգամավորը մասնավորապես գրել է․ «107 տարի առաջ 1915 թվականի ապրիլի 24-ին հարյուրավոր հայ մտավորականներ ձերբակալվեցին Ստամբուլում, քշվեցին դեպի Չանքըրը, Այաշ, Անկարա և բռնի կորսվեցին։ Իսկական արդարություն հնարավոր չէ հաստատել առանց այս պատմության հետ առերեսվելու, որը չարիքի սկիզբն է»։
Գրառմանը կից թուրք քաղաքական գործիչը տարածել է երկու լուսանկար․ Առաջինում՝ Հայոց ցեղապսանության զոհ մտավորականներն են, երկրորդում՝ Հայոց ցեղասպանության 100-րդ տարելիցի համար պաշտոնական խորհրդանիշ ընտրված անմոռուկը։
Թուրք ընդդիմադիր պատգամավորի այս գրառումը բացասական արձագանք է գտել Twitter-ի թուրք օգտատերերի շրջանում։
