Թուրքական տուրիստական գործակալությունն այցեր է կազմակերպում դեպի Հայաստան
Թուրքական «Gever turizm» տուրիստական գործակալությունը տուրեր է կազմակերպում Հարավային Կովկասի երկրներ՝ Հայաստան, Վրաստան ու Ադրբեջան, ինչպես նաև Իրան և Իրաք։ Այս մասին տեղեկացնում է ermenihaber.am-ը։
Գործակալությունը գտնվում է Վանում, բայց մեկնումներն իրականացվում են ոչ միայն Վանից, այլ նաև Մուրադիեից, Չալդըրանից, Դողուբայազեթից, Իգդիրից և Կարսից։
«Instagram»-յան էջում պարբերաբար գովազդային արշավ է իրականացվում դեպի Հայաստան 4-օրյա զբոսաշրջային այցի մասին։ Գործակալությունը ավտոբուսով տուրեր կազմակերպում՝ այցելելով Երևան, Գյումրի, Էջմիածին, Տաթևի վանական համալիր, Գառնի, Գեղարդ, քարերի սիմֆոնիա և Սևանա լիճ։
Տեղեկատվության մեջ նշվում է, որ վերոնշյալ երթուղով զբոսաշրջային այցն արժի 15.000 թուրքական լիրա (շուրջ 115.000 դրամ)։ Արժեքը ներառում է հարմարավետ միկրոավտոբուս, հյուրանոց և զբոսավարի (գիդ) ծառայություն։
Սոցիալական ցանցերում պարբերաբար տեսանյութեր ու լուսանկարներ են հրապարակվում Հայաստան կատարված այցերից, որտեղ զբոսաշրջիկները կիսվում են իրենց տպավարություններով։ Շեշտվում է, որ Հայաստանում պատմությունը, մշակույթը և բնությունը միահյուսված են իրար։
