Կառավարության արձագանքը վախեցնող է. մարտահրավերները շատ են, մարդիկ չգիտեն՝ ինչ անել, իշխանությունը պայքարում է աղամանի և ծխելու դեմ
«Պրեսսինգ» հաղորդաշարում Սաթիկ Սեյրանյանի հյուրը Պետական ֆինանսների կառավարման միջազգային փորձագետ, ՀՀ Ֆինանսների նախկին նախարար, «Վալլեքս» խմբի ընկերությունների ավագ փոխնախագահ Վարդան Արամյանն է:
Բանախոսը նշել է.
- Կոռուպցիոն ռիսկերը մեծանում են, երբ աճում է մեկ անձից գնումների կշիռը:
- Արդյո՞ք ստեղծված իրավիճակում ադեկվատ են Կառավարության գործողությունները. Ո՛չ:
- Աշխարհում գնաճը գլուխ է բարձրացնում, Կենտրոնական բանկին (ԿԲ) այլ ելք չի մնում, քան բարձրացնել տոկոսադրույքները:
- Ռուսաստանի՝ SWIFT համակարգից անջատումը դժվարացնելու է գործառույթները, մի քանի տարի առաջ Ռուսաստանը նախագծեց իր սեփական` SPFS այլընտրանքային վճարման համակարգը, որը հայկական երկու բանկ արդեն թեստավորել է:
- Եթե Ռուսաստանի դեմ կիրառվող պատժամիջոցների հետևանքով թուլանում է ռուսական ռուբլին, սա վատ լուր է՝ հատկապես Ռուսաստանի հետ առևտուր անող գործարարների համար:
- Փոխարժեքը տնտեսության ջերմաչափն է, եթե կա արժեզրկում, ուրեմն կա տնտեսության թուլացում:
- Ճգնաժամային վիճակում գտնվող երկրներից ֆինանսական միջոցների և մարդկանց խնայողությունների փախուստ է տեղի ունենում, այդ դեպքում՝ գուցե նաև դեպի Հայաստան:
- Էներգակիրների նկատմամբ էմբարգոյի առումով Եվրոպան շատ ավելի վատ վիճակում է հայտնվելու, քան ԱՄՆ-ը:
- Ըստ միջազգային որոշ վերլուծաբանների՝ ԱՄՆ-ը Ռուսաստանի դեմ պատժամիջոցներով թուլացնում է Եվրոպան. կա նաև Չինաստանի գործոնը, էներգակիրների առումով Չինաստանը մեծ կախվածություն ունի Ռուսաստանից, դրա համար փորձում է չմտնել խաղի մեջ:
- Կարճաժամկետ կտրվածքով՝ բավականին լուրջ ֆինանսական հոսքեր կգան Հայաստան ֆիզիկական անձանց փոխանցումների միջոցով, բիզնեսի առումով հոսքեր դեպի Հայաստան դեռ շուտ չի լինի:
- Բարձրաստիճան պաշտոնյաները թանկարժեք մեքենաներ են գնում, երբ այդ գումարը կարելի էր ուղղել երկրի պաշտպանությանն ու անվտանգությանը:
- Պարենային անվտանգության առումով Հայաստանը լուրջ խնդիրներ ունի, կառավարության արձագանքը վախեցնող է, գնաճը նորից գլուխ է բարձրացնում:
- Գյուղատնտեսության ոլորտում վարկային ծանրաբեռնվածությունը բարձր է, 2018-ի ֆոնի վրա դա ավելի է խորացել, իշխանության եկած նոր ուժը պարտքերը ներելու խոստումներ տալով՝ ոչ ռացիոնալ սպասումներ էր առաջացրել:
