Ուկրաինան և Նորվեգիան զբաղվելու են անօդաչուների համատեղ արտադրությամբ
Ուկրաինան և Նորվեգիան համատեղ անօդաչու թռչող սարքեր են արտադրելու։ Համապատասխան փաստաթուղթը ստորագրել են երկու երկրների պաշտպանության նախարարները, հայտարարել է Ուկրաինայի պաշտպանության նախարար Դենիս Շմիգալը Telegram-ում, հայտնում է «РБК-Украина»-ն։
«Սա կարևոր քայլ է, որը թույլ կտա մասշտաբավորել մեր հնարավորությունները և ուժեղացնել Ուկրաինայի պաշտպանությունը», – նշել է Շմիգալը։
Ըստ նրա, հաջորդ փուլը 2026 թվականին փորձնական արտադրական գծի շտապ գործարկումն է և զուգահեռաբար հզորությունների հետագա մեծացման ուղղությամբ աշխատանքը։
«Ուկրաինան Նորվեգիայի հետ կկիսվի իր փորձով և նորարարություններով։ Ի պատասխան՝ մենք կստանանք հզոր արտադրական հարթակ, որը մեր զինվորներին կապահովի ժամանակակից անօդաչուներով, ինչպես նաև գիտահետազոտական և կոնստրուկտորական համագործակցություն՝ Նորվեգիայի առաջատար հաստատությունների հետ», – հավելել է նա։
Ավելի վաղ հայտնի էր դարձել, որ Մեծ Բրիտանիան պատրաստվում է Ուկրաինայի հետ ստորագրել համաձայնագիր՝ առաջադեմ ռազմական տեխնիկայի համատեղ մշակման և արտադրության վերաբերյալ։ Այն նախատեսում է տեխնոլոգիաների փոխանակում, ինչը կուժեղացնի երկու երկրների ազգային անվտանգությունը։
Նախկինում Ուկրաինայի նախագահ Վլադիմիր Զելենսկին նշել էր, որ Ուկրաինան ԱՄՆ-ի հետ համատեղ սկսել է որսացող անօդաչուներ արտադրել, որոնք ունակ են պայքարելու Ռուսաստանի հարվածային անօդաչուների դեմ։
