«Հիմնական խոսակցությունն անվտանգության շուրջ էր՝ անվտանգության բուֆերային գոտի ստեղծելու համար. ժողովրդի խնդրանքը դա էր նախագահից». Հակոբ Արշակյան
Ինչպես ավելի վաղ տեղեկացրել ենք, Սյունիքի մարզ աշխատանքային այցի շրջանակում Հանրապետության նախագահ Արմեն Սարգսյանը Հայաստանի մարդու իրավունքների պաշտպան Արման Թաթոյանի հետ այցելել է Գորիսի քաղաքապետարան, որտեղ հանդիպել է Գորիս համայնքի ղեկավար Առուշ Առուշանյանի, Սիսիան համայնքի ղեկավար Արթուր Սարգսյանի և Գորիս խոշորացված համայնքի կազմում ընդգրկված բնակավայրերից՝ Խնձորեսկի ղեկավար Երվանդ Մալունցի, Հարթաշենի ղեկավար Արմեն Խաչատրյանի և Քարահունջի ղեկավար Լուսինե Ավետյանի հետ։
«Ինչ խնդիրներ որ կան, վարչական ղեկավարները ներկայացրել են. այն խնդիրներն են, ինչի մասին միշտ բարձրաձայնվում է»,- 168.am-ի հետ զրույցում նախագահի հետ հանդիպմանն անդրադառնալով՝ նշեց Գորիս համայնքի ղեկավար Առուշ Առուշանյանը:
Նա խոստացավ նախագահի հետ հանդիպման արդյունքներն ամփոփել ավելի ուշ, քանի որ նախագահ Սարգսյանը դեռ մարզում է, շրջում է գյուղերով և ծանոթանում խնդիրներին:
Նկատենք՝ ՀՀ նախագահը և Մարդու իրավունքների պաշտպանն այցի շրջանակում արդեն հանդիպել են պատերազմից հետո թշնամու նշանառության տակ հայտնված Շուռնուխ համայնքի բնակիչներին:
Համայնքի ղեկավար Հակոբ Արշակյանը մեզ հետ զրույցում տեղեկացրեց, որ բնակիչները նախագահի հետ խոսել են հատկապես անվտանգային խնդիրների մասին. «Հիմնական խոսակցությունն անվտանգության շուրջ էր՝ անվտանգության բուֆերային գոտի ստեղծելու համար. ժողովրդի խնդրանքը դա էր նախագահից:
Հարց բարձրացվեց նաև գյուղի գազիֆիկացման մասին»:
Շուռնուխ համայնքի ղեկավարը նշեց, որ նախագահը խոստացել է հետևողական լինել այս խնդիրների լուծման հարցում:
