«Կիբեր զինվորնե՞ր եք տանում՝ առանց բրոնեժիլետի, առանց կասկայի». Անհետ կորածի ծնող
Առավոտյան անհետ կորած զինծառայողների ծնողները հավաքվել էին Էջմիածնի զորամասի դիմաց: Հիշեցնենք՝ նրանք մտել էին զորամասի տարածք և հանդիպել հրամանատար Արսեն Աբգարյանի հետ՝ նրանից պահանջելով հանել զինվորական համազգեստը և միանալ իրենց:
Քո զորքը պատշաճ պատրաստվա՞ծ է եղել մարտական գործողությունների, ինչո՞ւ են զինվորներին առանց զրահաբաճկոնի ու սաղավարտի ուղարկել մարտական գործողության՝ հրամանատարից հետաքրքրվեցին հավաքվածները: Նա ի պատասխան՝ նշեց, որ հրաման են կատարել, և այդ հարցերով դիմել է և քննություն է հարուցված:
«Հրաման ես ստացել, հիմա՝ որպես քիմիական գումարտակի հրամանատար, քիմիական զենք օգտագործեցին, քեզ հրաման են տալիս՝ առանց հակագազի դուրս գալ քիմմաքրում կատարել, կանե՞ս: Կիբեր զինվորներ ե՞ք տանում՝ առանց բրոնեժիլետի, առանց կասկայի»,- ասաց ծնողներից մեկը:
«Այդ ամենից տեղյակ են եղել բոլորը, ինձ հրաման են տվել, կատարել եմ: Այդ պահին որոշում կայացնողը եղել է գեներալ-լեյտենանտ Անդրանիկ Մակարյանը»,- պատասխանեց հրամանատարը:
Ծնողները մտան զորամասի շտաբ՝ զրուցելու, ապա շարժվեցին Պաշտպանության նախարարություն: «Բոլոր գեներալները մեզ են սպասում: Մեզ ընդունելու է Նշանյան Վարդանը, Օնիկ Գասպարյանը, Անդրանիկ Մակարյանը»,- ասաց անհետ կորած զինծառայողի մայր Անահիտ Ադոյանը՝ հավելելով, որ հանդիպմանը մասնակցելու է նաև Էջմիածնի զորամասի հրամանատար Արսեն Աբգարյանը և պետք է պահանջի նաև լրագրողների ներկայությունը:
Հիշեցնենք՝ պատերազմի ավարտից հետո անհետ կորած զինծառայողների ծնողներն ու հարազատները պարբերաբար բողոքի ակցիաներ են իրականացնում Պաշտպանության նախարարության, Կառավարության, Ռուսաստանի Դաշնության շենքերի առջև։ Նրանցից մի քանիսին ընդունել էր նաև Նիկոլ Փաշինյանը։
