«Դատախազները չեն կարող մասնակցել գործի վարույթին». տուժողի ներկայացուցիչը դատախազներին բացարկի միջնորդություն ներկայացրեց

Սահմանադրական կարգի ենթադրյալ տապալման գործով դատական հերթական նիստում դատարանը՝ դատավոր Աննա Դանիբեկյանի նախագահությամբ,  քննեց քրեական գործով տուժող Սերգեյ Եղիազարյանի ներկայացուցիչ Էդուարդ Ասլանյանի՝ դատախազներ Գևորգ Բաղդասարյանին և Պետրոս Պետրոսյանին բացարկ հայտնելու միջնորդությունը:

Էդուարդ Ասլանյանի խոսքով՝ «դատախազները չեն կարող մասնակցել գործի վարույթին» և պետք է հեռացվեն վարույթից:

«Դատարանում քնննվող սույն գործի նյութերում բացակայում են և ներառված չեն 2008 թվականի մարտի 1-2-ը Երևան քաղաքում տեղի ունեցած իրադարձությունների պատճառով որպես տուժող և վկա Սերգեյ Եղիազարյանի հարցաքննությունների, նրա ցուցմունքների արձանագրությունները, տուժող ճանաչելու մասին որոշումը, դատաբժշկական փորձաքննության եզրակացությունը և հարուցված վարույթի շրջանակներում կազմված նյութերով կատարված հնարավոր այլ դատական գործողությունների մասին ապացույցներ:

Միաժամանակ, սույն գործի վարույթի ընթացքում որպես տուժող կողմ՝ Սերգեյ Եղիազարյանը զրկված է 2008 թվականին կազմված գործի նյութերին, այդ թվում՝ վերը նշված փաստաթղթերին ծանոթանալու հնարավորությունից՝ դրանք չտրամադրելու պատճառով»,- միջնորդությունը ներկայացնելով՝ ասաց Էդուարդ Ասլանյանը:

Փաստաբանի խոսքով՝ դատախազների գործունեության հետևանքով իր պաշտպանյալը զրկվել է 2008 թվականի 1-2-ը Երևանում տեղի ունեցած իրադարձությունների ժամանակ որպես տուժած անձ աջակցություն ստանալու հնարավորությունից:

Ըստ Ասլանյանի՝  նախաքննության ընթացքում իր պաշտպանյալի իրավունքների խախտումների մասին իմացել է դատախազ Պետրոս Պետրոսյանը, սակայն տուժողի իրավունքների խախտումներն արձանագրելու, դրանք վերացնելու և տուժողի իրավունքները վերականգնելու ուղղությամբ որևէ քայլ չի ձեռնարկել:

Էդուարդ Ասլանյանը նաև անդրադարձավ նախորդ դատական նիստերից մեկի ժամանակ դատախազների ներկայացրած միջնորդությանը, որով մեղադրողները դատարանից խնդրում էին սահմանափակել պաշտպանական կողմի տարբեր տեսակի միջնորդություններ ներկայացնելու դատավարական իրավունքը:

«Պնդում ենք, որ սույն քրեական գործով ամբաստանյալներին մեղսագրվող արարքները որևէ ընդհանուր առնչություն չունեն Երևան քաղաքում տեղի ունեցած իրադարձությունների պատճառով Սերգեյ Եղիազարյանին ֆիզիկական և նյութական վնաս պատճառելու հանգամանքի հետ, և, մասնավորապես, երբ մինչև օրս բացահայտված չեն իրական մեղավորները: Այսպիսով, մեղադրանքի  կողմ է հանդիսանում տուժողը, մեղադրանքի կողմը ներկայացնում է մեղադրողը: Ըստ էության մեղադրողը պետք է ստանձնի և իրականացնի տուժողի իրավունքների պաշտպանությունը՝ որպես հանրային իշխանությունների ներկայացուցիչ, որպիսին գործող դատախազները չեն կատարում, այլ հակված են սույն գործով ամբաստանյալների նկատմամբ շինծու մեղադրանքները կանխակալ կերպով և կողմնակալությամբ կապելուն»,- ասաց Էդուարդ Ասլանյանը:

Տուժողի ներկայացուցչի խոսքով՝  դատախազների կանխակալ վերաբերմունքը սույն քրեական գործին բացասական ազդեցություն է  ունեցել տուժող Սերգեյ Եղիազարյանի իրավունքների և օրինական շահերի պաշտպանության առումով:

Տուժողի իրավահաջորդների ներկայացուցիչ Սեդա Սաֆարյանն անդրադառնալով բացարկի միջնորդությանը՝ ասաց, թե դատախազներին բացարկ ներկայացնելու հիմնավորում միջնորդության մեջ չկար, և այն ենթակա է մերժման:

Գործով ամբաստանյալների պաշտպանները միացան տուժողի ներկայացուցչի՝ դատախազներին բացարկ հայտնելու միջնորդությանը:

Դատախազ Պետրոս Պետրոսյանը միջնորդության վերաբերյալ ներկայացրեց իր առարկությունները՝ նշելով, որ տուժողը դիմել է գործի նյութերին ծանոթանալու թույլտվություն ստանալու համար միայն այն ժամանակ, երբ գործը՝ մեղադրական եզրակացությամբ, ուղարկված էր դատարան:

«Տուժողը և նրա ներկայացուցիչը, եթե գտնում են, որ իրենք այս քրեական գործով անելիք չունեն, պաշտպանության կողմում հանդես գալու փոխարեն՝ ուղղակի կարող են դատարանին միջնորդել, որպեսզի իրենց դատավարական լիազորություններն այս քրեական գործով դադարեցվեն»,- ասաց դատախազ Պետրոս Պետրոսյանը:

Դատախազ Գևորգ Բաղդասարյանն էլ ասաց, թե ներկայացված միջնորդության փաստարկների մասին ոչինչ չունի ասելու, քանի որ ներկայացված միջնորդությունն ընդամենը կասկածի տակ է դրել ու վերահաստատել է մեղադրող կողմի պատկերացումը, թե տուժողն ու իր ներկայացուցիչն իրականում ինչ դատավարական շահ են հետապնդում:

Դատախազի խոսքով՝ այս միջնորդությունն ընդամենը հայտարարություններ անելու առիթ էր, իրականության հետ կապ չունի, «մեղմ ասած, հիմնավոր չէ»:

Դատախազների գործողությունները վրդովվեցրին Էդուարդ Ասլանյանին: Միջնորդության հեղինակը հորդորեց դատավարության կողմին իր գիտելիքները չդնել խոշորացույցի տակ՝ նշելով, թե դատախազներն ակնհայտ իրենց քայլերով սրում են իր ու իր վստահորդի հարաբերությունները:

Տուժողի ներկայացուցչի միջնոդությունը քննության առնելուց հետո դատարանը հեռացավ խորհրդակցական սենյակ: Որոշումը կհրապարակվի այսօր՝ 17:50-ին: