«Մենք տեղեկատվական ոլորտում պարտվեցինք. տեղեկատվական ոլորտը լրիվ դատարկ էր». Արմինե Ադիբեկյան

Ադրբեջանի հարցերով փորձագետ Արմինե Ադիբեկյանն այն կարծիքին չէ, թե Ադրբեջանի նախագահ Ալիևը հատուկ է հայ-ադրբեջանական սահմանին գործողություններ սադրել, որպեսզի խափանի բանակցային գործընթացը:

«Այդ բանակցությունները՝ բանակցությունների համար, ձեռնտու են նաև Ալիևին, այլ հարց է, թե ինչ է ասում նա իր հասարակությանն այդ հարցի վերաբերյալ: Ալիևը կա՛մ կփորձի ավելի թեժացնել իրավիճակը, կա՛մ կասի՝ եկեք նոր էջից սկսենք բանակցությունները, որովհետև այսպես հնարավոր չէ, կորուստներ ենք կրում, և այլն: Այսինքն՝ դա կախված է շատ գործոններից, և քանի որ մենք չենք տեսնում՝ ինչ է կատարվում Ադրբեջանի ներսում, հիմա ես դժվարանում եմ կանխատեսել, թե Ալիևն ինչ քայլերի կդիմի: Բայց նա հնարավորություն ունի օգտագործել այս իրավիճակը, ինչպես նաև հայկական կողմը՝ մենք էլ կարող ենք դա մեր շահերին ծառայեցնել հենց բուն բանակցային պրոցեսում»,- 168TV-ի «Ռեվյու» հաղորդման ընթացքում ասաց նա:

Հիշեցնենք, որ Հայաստանի և Ադրբեջանի ԱԳ նախարարների հեռավար հանդիպումից հետո Ալիևը հայտարարել էր. «Ես ասել եմ, որ մենք չենք բանակցի հանուն բանակցությունների, մենք ուզում ենք, ըստ էության, բանակցություններ՝ առանց դրանց ձևաչափը փոխելու։ Այդ դեպքում մենք, անշուշտ, դրանց կմասնակցենք, հակառակ դեպքում՝ անիմաստ բանակցությունների կարիքը չենք տեսնում»:

Արմինե Ադիբեկյանը նշեց, որ առարկայական բանակցությունների թեման պարբերաբար դրվում է շրջանառության մեջ. «Քանի որ Ադրբեջանը փուլային  տարբերակի երկրպագու  է և փորձում է փուլային տարբերակով լուծել կոնֆլիկտը, առարկայականը նշանակում է, որ սկսում են արդեն բուն քայլերից խոսել, բուն ճանապարհային քարտեզը վերլուծել, թե կոնկրետ փուլ առ փուլ ինչ քայլերի պետք է կողմերը գնան, որ հանգուցալուծեն խնդիրը: Բայց դա, իհարկե, անհեթեթություն է, քանի որ փուլայինը նախ՝ մեզ ձեռք չի տալիս, և երկրորդ՝ անգամ, եթե խոսվում է փուլայինի մասին, ապա մինչ այդ շատ ու շատ հարցեր պետք է լուծվեն՝ մոնիտորինգի հարցը, կողմերի պարտավորվածությունը՝ չխախտել ռեժիմը, այսինքն՝ շատ ու շատ հարցեր կան, որ մինչև չլուծվեն, ո՛չ փուլայինի, ո՛չ փաթեթայինի մասին անգամ չենք կարող երազել»:

Ըստ ադրբեջանագետի՝ Ալիևը խոսքով արկածախնդիր է, բայց գործողությունների դեպքում՝ միշտ գիտի՝ երբ պետք է կանգնի, երբ հետ քաշվի. «Ապրիլյանը դրա ապացույցն էր, այսինքն՝ երբ արդեն ակնհայտ էր, որ հայկական կողմը մտնելու է Ադրբեջան և իրենց է՛լ ավելի քշի, միանգամից կապվեցին Ռուսաստանի հետ և խնդրեցին բանակցությունների հրավիրել»:

Էրդողան-Թրամփ հեռախոսազրույցից հետո Արմինե Ադիբեկյանն այս պահին մտահոգություն չունի, որ թուրք-ադրբեջանական տանդեմը գործողությունների կգնա Նախիջևանում. «Ճիշտ է՝ պաշտոնական հաղորդագրության մեջ ասվում է, որ խոսել են Չինաստանից, փոխադարձ առևտրական հարաբերություններից, բայց այս նեղ մաջալին հաստատ դրանով չեն եզրափակվել: Ինձ թվում է՝ Էրդողանին ասվել է՝ քեզ չորրորդ թեժ կետը պետք չէ, բացի այդ՝ դա կարող է բերել Ռուսաստանի հետ լուրջ խնդիրների, որովհետև իրականում մեր տարածաշրջանում գոյություն ունեցող բոլոր պետությունները ռուս-թուրքական պայմանագրերի շնորհիվ են տեղի ունեցել, և Թուրքիան Նախիջևան մտնելիս պետք է հաշվարկի Ռուսաստանի պատասխան քայլերը: Դա ոչ թե հայ-ադրբեջանական, հայ-թուրքական, այլ՝ ռուս-թուրքական հարաբերություններ են, և լրիվ ուրիշ հարթություն է»:

Անդրադառնալով ՀԱՊԿ-ի կողմից հրավիրված հրատապ նիստը չեղարկելուն, նա ասաց, որ, եթե մեկից ինչ-որ բան ես ակնկալում, պետք է մինչ այդ ակնկալիքները պատշաճ վերաբերմունք ցուցաբերես.

«Այնպես, ինչպես Հայաստանն իրեն պահեց ՀԱՊԿ-ի նկատմամբ, լրիվ կանխատեսելի էր և ակնկալելի էր, որ ՀԱՊԿ-ն այսպիսի դիրք կընդունի: Յուրի Խաչատուրովի դեպքը, տարբեր հայտարարությունները, որ ՀԱՊԿ-ը մեզ պետք չէ, բայց հենց նեղն ընկանք՝ իսկ ՀԱՊԿ-ը ինչո՞ւ է լռում: Իսկ ՀԱՊԿ-ը ինչո՞ւ չպետք է լռի, երբ նրա նկատմամբ արդեն 2 տարուց ավելի անհարգալից վերաբերմունք ես ցուցաբերում»:

Դիտարկմանը՝ կարծիքներ կան, որ ադրբեջանական լոբբիի արդյունքում ՀԱՊԿ հրատապ նիստը չեղարկվեց, նա այսպես արձագանքեց. «Գիտե՞ք՝ ինչ՝ եթե ինչ-որ մի տեղ դու դատարկում ես, այդտեղ ինչ-որ մեկը գալիս-զբաղեցնում է, դա նորմալ է: Այսինքն՝ այստեղ մեր թերացումն է, որ մենք այդ տեղն ազատեցինք, և այն զբաղեցրեց ադրբեջանական լոբբին: Այո, վատ է, ցավալի է, ես չգիտեմ՝ մենք ո՞նց ենք այդ խնդիրը լուծելու, եթե մենք այս լոկալ խնդիրներով չենք կարողանում խնդիրը լուծել, բա պատկերացրեք, Աստված ոչ անի, լուրջ ռազմական գործողություններ սկսվեն, ի՞նչ ենք անելու»:

Նա անդրադարձավ նաև կառավարության նիստում Դավիթ Տոնոյանին ուղղված Նիկոլ Փաշինյանի հարցին՝ նշելով հարցի պոզիտիվ կողմերը. «Հաշվի առնելով, որ մենք տեղեկատվական ոլորտում պարտվեցինք, տեղեկատվական ոլորտը լրիվ դատարկ էր, ու դա հեղեղված էր ադրբեջանական տեղեկատվությամբ, վարչապետի այս հարցը հնարավորություն տվեց պաշտպանության նախարարին՝ ևս մեկ անգամ հնչեցնել հայկական կողմի դիրքորոշումը, տեսակետը, և այն, թե ինչպես ենք մենք տեսնում և մեկնաբանում տեղի ունեցածը: Քանի որ դա պաշտոնական հայտարարություն էր, թարգմանվեց և տարածվեց մամուլով, և ևս մեկ անգամ մեր տեսակետը հնչելի դարձավ: Բայց թե ինչու է Փաշինյանը նման հարց տվել, ես դժվարանում եմ ասել»:

Հիշեցնենք, որ վարչապետ Նիկոլ Փաշինյանը կառավարության նիստի ժամանակ պաշտպանության նախարար Դավիթ Տոնոյանին հետևյալ հարցն ուղղեց. «Այսինքն՝ տպավորություն է, որ հնարավոր է, որ ադրբեջանցի զինվորները մոլորվել են, և հետո, չգիտես ինչո՞ւ, մեր զինվորների զգուշացումից հետո մեքենան թողել ու հեռացել են։ Հնարավո՞ր է՝ այդ մեքենայի հետ է կապված եղել, ուզել են վերադարձնել, դրա համար են այդ գործողությունը սկսել»։

Ինչ վերաբերում է այս իրավիճակում հայկական լրատվամիջոցների աշխատանքին, նա ասաց, որ խնդիր ունենք ոչ թե լրատվամիջոցների, այլ համապատասխան կառույցների հետ, որոնք պետք է արտասահմանյան մամուլի միջոցով տարածեին հայկական կողմի տեղեկատվությունը. «Չեն գործել բոլոր նախատեսված և հատուկ պատրաստված հարթակները, որոնք պետք է գործեին ստեղծված պարագայում: Պաշտոնապես չի հերքվել ադրբեջանական ապատեղեկատվությունը: Ինչ արվել է՝ արվել է էնտուզիաստների ուժերով, և դրա վրա պետք է աշխատել: Լրատվամիջոցն ի՞նչ անի, 168.am-ը ի՞նչ կարող է անել այդ պարագայում: Դուք ձեր հնարավորությունների սահմաններում ապահովում եք օպերատիվությունը, ճշգրտությունը և ծավալը: Հիմա, եթե դուք դա անում եք, դուք ձեր պարտքը դրանով կատարում եք, դրանից ավել ոչինչ չպետք է անեք»:

Մանրամասները՝ տեսանյութում