Տիգրան Արզաքանցյանին առնչվող գործ է քննվում ՔԿ-ում
Երկու ամիս է, ինչ հեղափոխական իշխանության թիրախում է հայտնվել ՀՀԿ-ական երբեմնի օլիգարխ պատգամավոր Տիգրան Արզաքանցյանը։
Հարուցված քրեական գործի շրջանակներում Քննչական կոմիտեում (ՔԿ) քննվում է նախկին պատգամավորին առնչվող 3 տարբեր ընկերությունների միջև կնքված մի քանի դրվագներից բաղկացած մութ գործարքի հետագիծը, որը տանում է մինչև Արզաքանցյանի ազգակցական կապեր։ Մեղադրանքն առաջադրված է, իհարկե, այլ անձի՝ Մարտիկ Արզաքանցյանի նկատմամբ, ով ոչ միայն Տիգրան Արզաքանցյանի ազգականն է, այլև նրա աջ ձեռքն է համարվում։ Ծնունդով գավառցի սույն անձի դեմքով՝ նախկին պատգամավոր Տիգրան Արզաքանցյանը ոչ վաղ անցյալում մասնակցում էր շինարարական մրցույթների ու հանքարդյունաբերական բիզնես ոլորտում ծանրակշիռ գործարքներ էր կնքում։
ՔԿ-ում քննվող սույն գործով 168.am-ին հայտնի են դարձել որոշ դրվագներ։ Արզաքանցյանին նախկինում պատկանող «Պարամաունտ գոլդ մայնինգ» ՓԲԸ-ում նոր իրավատիրոջ կողմից բացահայտվել են առանձնապես խոշոր չափի՝ 6 մլն 251 հազար դոլարը գերազանցող գույքային վնասներ, որոնք իրականացվել են Տիգրան Արզաքանցյանի վստահորդ Մարտիկ Արզաքանցյանի տնօրեն եղած շրջանում։
Պարզվում է, վերջինս մեծահոգաբար փորձել է ժեստ անել և «Պարամաունտ գոլդ մայնինգ» ՓԲԸ հաշվին մարել է Տիգրան Արզաքանցյանի հետ փոխկապակցված երկու այլ ընկերությունների՝ «Գրեյթ Վելլի Հ/Ձ» և «Ալեքս Մաքսիմուս» ՓԲԸ կողմից «Արդշինբանկում» ունեցած ահռելի ծավալի դոլարային վարկի պարտավորությունները, և ներքին պայմանավորվածությունների արդյունքում գրավադրվել է «Պարամաունտ Գոլդ Մայնինգի» ունեցվածքը։ Հետագայում այս երկու ընկերությունները՝ «Գրեյթ Վելլի Հ/Ձ» ՍՊԸ-ն և «Ալեքս Մաքսիմուս» ՓԲԸ-ն, սնանկացել են, իսկ բանկի հանդեպ ունեցած պարտավորության դիմաց փաստի առջև է կանգնել «Պարամաունտ գոլդ մայնինգ» ՓԲԸ-ն։
Սակայն ուշագրավ է այն, որ Մարտիկ Արզաքանցյանի և իր ղեկավարած ՓԲԸ-ի անունները համացանցում որոնելիս՝ ի հայտ են գալիս առավել ուշագրավ տեղեկություններ։ Օրինակ, Մարտիկ Արզաքանցյանը հանդիսացել է նաև 2005թ. հիմնադրված «Նիկել սար» ՍՊԸ տնօրենը, որի փաստացի հիմնադիրն ու 100 տոկոսանոց բաժնետերը, ըստ Արդարադատության նախարարության ռեգիստրի տվյալների, Տիգրան Արզաքանցյանն է համարվում։ Իսկ «Նիկելի սար» ՍՊԸ-ն 2012թ․ Էներգետիկայի և բնական պաշարների նախարարությունից ստացել է Շիրակի մարզում թվով երկու բազմամետաղ հանքերի երկրաբանական ուսումնասիրության թույլտվություն։
Իսկ ահա «Պարամաունտ գոլդ մայնինգի» մասով գործել է երկու նույնանուն ընկերություն՝ գրանցված տարբեր իրավական կարգավիճակներով՝ ՓԲԸ և ՍՊԸ, և, ընդ որում, երկուսն էլ Տիգրան Արզաքանցյանի անձի հետ են կապված, միայն մի տարբերությամբ, որ ՍՊԸ-ի դեպքում նրա բաժնետերերից մեկը ՀՀ ԱԺ նախկին նախագահ Հովիկ Աբրահամյանն է եղել։ Համացանցում տեղեկություն կա նաև այն մասին, որ 2010թ. ԱԺ նախկին նախագահ Հովիկ Աբրահամյանին պատկանող «Պարամաունտ գոլդ մայնինգ» ՍՊԸ-ն ստացել է հանքարդյունահանման լիցենզիա:
Սյուզի Բադոյան
