Հյուսիսային Կորեան բալիստիկ հրթիռ է արձակել Ճապոնական ծովի ուղղությամբ
Հյուսիսային Կորեան նոյեմբերի 7-ին առնվազն մեկ բալիստիկ հրթիռ է արձակել Ճապոնական ծովի ուղղությամբ: Ամենայն հավանականությամբ, դա եղել է փոքր հեռահարության հրթիռ։ Այս մասին հաղորդում է Yonhap-ը՝ հղում անելով Հարավային Կորեայի զինվորականներին։
Ճապոնիայի պաշտպանության նախարարությունը նույնպես հայտնել է Հյուսիսային Կորեայի կողմից բալիստիկ հրթիռի հավանական արձակման մասին։
Ճապոնիայի առափնյա պահպանության ծառայությունը, հղում անելով պաշտպանության նախարարությանը, նաև պարզաբանել է, որ «ենթադրյալ բալիստիկ հրթիռը, հավանաբար, արդեն ընկել է», և կոչ է արել ծովում գտնվող նավերին ուշադիր հետևել ստացվող տեղեկատվությանը։
Վերջին անգամ ԿԺԴՀ-ն հյուսիսարևելյան ուղղությամբ փոքր հեռահարության բալիստիկ հրթիռներ է արձակել հոկտեմբերի 22-ին՝ Հարավային Կորեայում կայանալիք Ասիա-խաղաղօվկիանոսյան տնտեսական համագործակցության գագաթնաժողովի և ԱՄՆ նախագահ Դոնալդ Թրամփի՝ երկիր այցի նախաշեմին, հիշեցնում է գործակալությունը։
