3,5 տարեկան երեխայի բռնության դեպքը ջրվեց-գնաց. Երևանի քաղաքապետարանում «քնած» են
Երևանի թիվ 94 մանկապարտեզում երեխայի բռնության դեպքն այդպես էլ անհետևանք մնաց: Ոստիկանությունը՝ փաստն արձանագրած կապտուկների լուսանկարները, առկա տեսագրությունների ու ծնողների նամակագրություների բազան բավարար հիմք չհամարեց, որպեսզի 28-ամյա դաստիարակի նկատմամբ քրեական գործ հարուցի: Դատախազությունն էլ, իր հերթին, ամրագրեց ոստիկանության տված դիրքորոշումը: Անհասկանալի է մնում ոլորտի լիազոր մարմնի՝ քաղաքապետարանի կեցվածքը:
Քաղաքային հեղափոխական իշխանության ներկայացուցիչները՝ ձեռքները ծալած նստել են, դեռ նոր-նոր պիտի հանդիպեն միջադեպի կողմերին՝ ուսումնասիրելու երկու-երեք ամիս առաջ երեխայի նկատմամբ գրանցված բռնության դեպքի հանգամանքները:
Նշենք, որ իրավապահների դիրքորոշումը վերաբերում էր կնոջ նկատմամբ քրեական գործ հարուցելու հիմքերին, մինչդեռ քաղաքապետարանը չպետք է կաշկանդվեր այս մարմնի գնահատականից, զուտ երեխայի իրավունքի նկատառումով և հետագա բռնության դեպքերը բացառելու համար պարտավոր էր ինքն իր լիազորությունների տիրույթում որոշում ընդունել՝ վարչական տույժի կիրառումից, նկատողություն տալուց մինչև ազատման հրաման:
Մինչդեռ շահագրռվածություն կարծես թե չկա, քաղաքապետարանը կախված է դաստիարակի քմահաճույքից, սպասում են՝ մինչև դեպքի «հերոսը» կվերադառնա արձակուրդից: Միջադեպի առանցքում հայտնված 28-ամյա դաստիարակին դեպքերից հետո ծնողների մոտ կրքեր չթեժացնելու համար հարկադրաբար էին ուղարկել մեկամսյա արձակուրդ:
«Ուսումասիրությունները դեռ չեն սկսվել, որովհետև մարդը, ով այս ամենի կենտրոնում է կանգնած, արձակուրդում է գտնվում: Իսկ մենք չենք պարտավորվում, չենք ուզում նրա արձակուրդում գտնվելու հատվածում հրավիրել նրան և որևէ աշխատանք տանել: Այդ կնոջ ներկայությունը կարևոր է, միայն էմոցիաներով չենք կարող սահմանափկվել, որևէ hրաման արձակելու համար մեզ փաստական հանգամանքներ են հարկավոր, որպեսզի անվիճարկելի որոշում կայացնենք»,- 168.am-ին պարզաբանում է փոխքաղաքապետ Տիգրան Վիրաբյանը՝ այս կերպ պատճառաբանելով մինչ օրս չձեռնարկած քայլերը:
«Կվերադառնա դաստիարակը արձակուրդից և երևի թե տասնօրյա ուսումանսիրություների արդյունքներից հետո մենք մեր տիրույթում կհասկանանք՝ ինչ անել»,-նորից ժամանակ վերցնելով՝ հայտարարում է պաշտոնյան:
Կինը մայիսի 8-ին վերադարձել էր աշխատանքի և հենց նույն օրը քաղաքապետարանի կամքին հակառակ՝ իր հաշվին կրկին արձակուրդ էր վերցրել:
Կնշանակի թեման փակվեց… անհարկի ձգձգումներով քաղաքապետարանը դեռևս անգործության կմատնվի, քանի որ առանց մեղավոր անձի ոչ մի կերպ չեն ուզում ներքին քննությանն ընթացք տալ:
Փոխքաղաքապետ Վիրաբյանն ու մյուս պաշտոնյաները հարկ չեն համարել մինչ օրս լսել միջադեպի մյուս կարևոր հերոսին. պարբերաբար ծեծի ենթարկելու դեպքին տեղյակ է եղել մանկապարտեզը տնօրինած Լուսինե Ղասաբօղլյանը: Հիշեցնենք, այս կինն էլ իր հերթին էր կոծկել միջադեպը, ծնողների բողոքների ու ժողովների մասին չէր զեկուցել վերադասին: Միայն հետագայում պարզ դարձավ, որ տնօրենը ծածկադմփոց էր արել բարձրացող աղմուկից խուսափելու համար, որպեսզի չխոչընդոտի թիվ 51 դպրոցում տնօրեն նշանակվելու գործընթացին:
Ստացվում է՝ առանցքային դեմքերը խուսափել են պատասխանատվությունից, իսկ միջադեպի առանցքում տուժած երեխայի ընտանիքը մնացել է մեն-մենակ:
Իսկ երեխա՞ն…
Ի՞նչ եղավ երեխայի հետ, որի նկատմամբ նույն դաստիարակը պարբերաբար բռնություն էր գործադրել։
Այս հարցի պատասխանը փոխքաղաքապետ Տիգրան Վիրաբյանը չուներ: Մինչ օրս տուժած երեխային գոնե ձևի համար քաղաքապետարանից հարկ չէին համարել հանդիպել: Նրան փորձ չի արել տեսնելու նաև փոխքաղաքապետ Տիգրան Վիրաբյանը, ում կուրացիայի տակ է գտնվում երեխաների իրավունքների պաշտպանության ոլորտը, և նա է պատասխանատու ու պիտի երաշխավորի պետական մանկապարտեզ հաճախող ամեն մի երեխայի անվտանգոթյունը:
Ի դեպ, միջադեպից տուժած երեխան դեպքերից հետո հրաժարվել է ոտք դնել մանկապարտեզ, անհասկանալի պատճառով ձգձգվում է փոքրիկ տղային մեկ այլ մանկապարտեզում տեղավորելու գործընթացը: Փոխարենը՝ դեպքերի ազդեցությունը մեղմելու համար մայրը՝ որդու հետ հոգեբանի մոտ մի քանի այց է կատարել:
Երեխան հայր չունի, մայրը շոու-բիզնեսի հայտնի արտիստներից մեկն է, դա էլ քաքաղապետարանում նոր են պարզել:
Քաղաքապետարանը մամուլից էր տեղեկացել նաև այն մասին, որ գործի նախաքննության փուլում խմբի դայակը լքել է մանպարատեզը:
168.am-ը գրել էր, միջադեպի հետ անուղղակիորեն առնչվող խմբի դայակը, որին երեխաներն անչափ շատ էին սիրում, գործի քննության փուլում անսպասելի ազատման դիմում է գրել: Վարկած կա, որ կնոջը ներսում բարոյապես ճնշել էին, «գործ տվող» անվանել, մեղադրել էին բռնության դեպքերի մասին ծնողներին ինֆորմացիա տալու մեջ: Բայց այս հանգամանքի վրա փոխքաղաքապետ Վրաբյանը աչք է փակել, քաղաքապետարանի ուշադրությունից դուրս է մնացել գործով միակ վկայի նկատմամբ հնարավոր ճնշումների գործոնը, նրան լսելու խիստ կարևոր հանգամանքը: Ընդ որում, մեզ հասած տեղեկություններով՝ մանկապարտեզում դայակի դեմ արշավին միացած է եղել նաև տնօրեն Անի Սուքիասյանը, ով դիմումը մակագրելուց առաջ նույնիսկ փորձ չի արել հանդիպել հեղինակին, պարզել հանգամանքները, մեկ այլ խումբ տեղափոխելու առաջարկ անել:
Ստացվում է՝ դայակը, որ խիստ անապահով ընտանիքից էր, անուղղաիորեն դարձավ այս միջադեպի երկրորդ զոհը… Ընտանիքի միակ կերակրող կինը կորցրել է աշխատանքը: Եվ այս կնոջ ազատման դիմումը, դրա հետևում թաքցվող ինտրիգային պատմությունը այդպես էլ չհետաքրքրեց վերադաս մարմնի պաշտոնյաներին:
168.am-ի հարցին, թե ո՞վ է, ի վերջո, այս անպաշտպան կնոջը մեկ այլ աշխատանք երաշխավորելու, փոխքաղաքապետ Վիրաբյանը աբսուրդի հասնող պատասխան տվեց: Նրա ասածից պարզ էր դառնում, որ իրենք տեր չեն թույլերին ու անպաշտպան մարդկանց, որոնց վրա կարող են ճնշում գործադրել:
«Եթե մեկին կարողանում են հարկադրել՝ դիմում գրելու և ինքը չգիտի իր իրավուքներն ու պարտականությունները, և ինքը չի տիրապեում իրավիճակին, որ այլևս մեր երկրում ոչ ոք ոչ մեկին չի կարող պարտադրել, ուրեմն այդ մասով ես անելիք չունեմ»,- այսպես ասաց փոխքաղաքապետ Վիրաբյանը:
Պաշտոնյայի տարօրինակ մեկնաբանությունից հետո հարցապնդմանը, թե Ձեր կուրացիայի տակ անպաշտպան են, փաստորեն, ոչ միայն երեխաները, այլև նրանց մասին հոգ տանող դայակները, փոխքաղաքապետը ասվածը փորձ արեց իբր մեղմել:
«Այո շատ ազատումների, կճատումների մասին մենք իմանում ենք մամուլից, և սա նորմալ է: Ընդհանուր առմամբ մեր ենթակայության տակ գործող բոլոր 350 ՊՈԱԿ-ներին, այդ թվում՝ մանկապարտեզների տնօրեններին տրված է իրենց աշխատակազմերը ղեկավարելու լիիրավ իրավունք և հետևապես պարտադիր չի, որ իրենց մոտ ցանկացած ազատումից կամ նշանակումից Երևանի քաղաքապետարանը տեղյակ լինի: Եթե այդ կնոջը իսկապես ճնշել են, և ինքը պատրաստ է բարձրաձայնել այդ մասին, ես կուսումնասիրեմ այդ դեպքը»,-եզրափակեց Վիրաբյանը:
Սյուզի Բադոյան
Հ.Գ. Ապրիլի 23-ին Երևանի ավագանու նիստին ԲՀԿ խմբակցության քարտուղար Հռիփսիմե Առաքելյանը բարձրացրել էր այս միջադեպի թեման և պահանջել քաղաքային իշխանության գնահատականը՝ պետական մանկապարտեզում գրանցված երեխայի բռնության դեպքին և դայակի ազատման դիմումի վերաբերյալ:
Փոխքաղաքապետը հոխորտալից տոնով հայտարարել էր, թե այդ պատմությունն ունի ենթաշերտ, ինչին լավատեղյակ է և շուտով կբարձրաձայնի, ու կոչ էր արել երեխաների հետ կապված խնդիրները չտեղափոխել ներանձնային դաշտ և չդարձնել մամուլի քննարկման առարկա: Պարզվում է՝ ինտրիգային հայտարարության տակ շատ լուրջ բան չկար, հասցեատերերը միջադեպի կողմեը չէին, ընդամենը կոչ էր այս թեմայից առիթավորվողներին:
