«Վաղ առավոտից ընտրություններն անցնում են բնականոն հունով, որևէ խախտում չի եղել, բողոքներ չեն ստացվել». ՀԱԿ հանձնաժողովի նախագահ
Երեւանի Ս. Սպանդարյանի անվան թիվ 24 դպրոցում տեղակայված 9/18 ընտրատեղամասում ընտրական գործընթացը անցնում է հանդարտ, առանց լուրջ խախտումների: Այս մասին «Արմենպրես»-ի հետ զրույցում նշեց հանձնաժողովի նախագահ, ՀԱԿ ներկայացուցիչ Սոֆյա Յորդեկյանը:
«Վաղ առավոտից ընտրություններն անցնում են բնականոն հունով, որեւէ խախտում չի եղել, բողոքներ չեն ստացվել: Տեխնիկական սարքավորումները նորմալ աշխատում են, մատնահետք չճանաչելու դեպք չի եղել, տեսախցիկներն աշխատում են»,- ասաց Սոֆյա Յորդեկյանը:
Ժամը 11:00-ի դրությամբ նշված ընտրատեղամասում իր քաղաքացիական պարտքն է կատարել 200 ընտրող: Ընդհանուր առմամբ՝ այս ընտրատեղամասում ընտրելու իրավունք ունի 1665 քաղաքացի:
«Ժառանգություն» կուսակցությունից հանձնաժողովի անդամ Ռշտուն Մարտիրոսյանը նշեց, որ մինչ այժմ որեւէ խախտում չի գրանցվել: «Այս ընտրատեղամասը միշտ աչքի է ընկել իր կարգապահությամբ: Այստեղ սովորաբար լուրջ խախտումներ չեն լինում»,- ասաց նա:
Անդրադառնալով ընտրական գործընթացին՝ Ռշտուն Մարտիրոսյանը նշեց, որ ամեն դեպքում պասիվություն է նկատվում՝ համեմատած խորհրդարանական ընտրությունների հետ:
