Գյուղնախարարությունը հետ կստանա իր սառնարան-բեռնատարները
ՀՀ կառավարության կողմից «Գալոպեր» ՍՊ ընկերությանը ժամանակավոր պահատվության հանձնված` 19.9 մլն 23.5 մլն դրամ սկզբնական արժեքներով «Ֆորդ Տրանզիտ» և «ԻՍՈՒԶՈՒ» մակնիշների բեռնատար (սառնարան) ավտոմեքենաները կփոխանցվեն Գյուղատնտեսության նախարարության սննդամթերքի անվտանգության պետական ծառայության աշխատակազմին։
Ըստ որոշման նախագծի՝ ԳՆ «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» և «Անասնաբուժասանիտարական և բուսասանիտարական ծառայությունների կենտրոն» ՊՈԱԿ-ներն ունեն սառնարան-ավտոմեքենաներով ապահովման կարիք` լաբորատոր նմուշները և պետպատվերի շրջանակներում իրականացվող պատվաստումների համար անհրաժեշտ պատվաստանյութերը պատշաճ ջերմային ռեժիմով հանրապետության ողջ տարածքից տեղափոխելու համար:
«Համայնքների գյուղատնտեսական ռեսուրսների կառավարման և մրցունակության» երկրորդ ծրագրի շրջանակներում այս ՊՈԱԿ-ների համար ձեռք են բերվել «Ֆորդ Տրանզիտ» և «ԻՍՈՒԶՈՒ» մակնիշի բեռնատար (սառնարան) ավտոմեքենաներ, որոնք ժամանակավոր պահատվության են հանձնվել «Գալոպեր» սահմանափակ պատասխանատվությամբ ընկերությանը։
Թե ինչո՞ւ էին ավտոմեքենաները պահ տրվել այլ մասնավոր ընկերության, որոշման նախագծում չի նշվում։
