«Գուցե նախագահը սահմանադրական փոփոխություններ չի՞ ուզում». Վարդան Բոստանջյան
ԱԺ ՀՀԿ խմբակցության պատգամավոր Վարդան Այվազյանն այսօր լրագրողների հետ հանդիպման ըթնացքում ասաց, որ Սահմանադրության նոր նախագիծը շատ ավելի լավն է, քան գործող Սահմանադրությունը. «Ես երկու առաջարկ եմ արել, երկուսն էլ ընդունվել է: Առաջին առաջարկը Կենտրոնական բանկի խնդիրների ու նպատակների հետ է կապված: Գրված էր, որ գնաճի հիմնական կարգավորումը Կենտրոնական բանկի խնդիրն է, ասել եմ՝ դա չի կարելի միանշանակորեն ընդունել, որովհետև չի կարող Կենտրոնական բանկը պատասխան տալ միայն և միայն գնաճի համար: Այդ դեպքում ո՞ւր մնաց Տնտեսական մրցակցության հանձնաժողովը, Էկոնոմիկայի նախարարությունը և այլն:
Երկրորդ խնդիրը վերաբերում էր մենաշնորհներին, ես առաջարկեցի՝ արգելել մենաշնորհներն օրենքով: Տնտեսական մրցակցության այսօրվա օրենքը թույլ է տալիս, որ լինեն մենաշնորհներ: Այդ մենաշնորհային վիճակը մեր տնտեսական ամբողջ համակարգը խաթարում է. ընդունենք, թե չընդունենք»:
Ըստ նրա՝ Սահմանադրության այս տարբերակը թույլ է տալիս նաև քաղաքական մենաշնորհից դուրս գալ. «1995-ից պատգամավոր եմ ու չի եղել մի ժամանակահատված, որ համամասնական ընտրություններում քաղաքական որևէ մի ուժ վերցնի բացարձակ մեծամասնություն: Հիմա, որ մենք (ՀՀԿ) ունենք բացարձակ մեծամասնություն, համամասնական ցուցակով անցած 40 կամ 43 պատգամավոր ունեինք, 66-ը լրացրել ենք մեծամասնականով: Հիմա ասում ենք՝ հրաժարվում ենք մեծամասնականից. ի՞նչն է խնդիրը, չեմ հասկանում»:
Տնտեսագիտության դոկտոր, պրոֆեսոր Վարդան Բոստանջյանն էլ նշեց, որ գործող նախագահը շախմատի սեղանի շուրջ բազմաքայլ անձ է. «Նա ստեղծեց այս սահմանադրական փոփոխությունները ու հիմա բոլորը շշմած քննարկում են, թե նախագահը ուզում է այս փոփոխությունները, բայց գուցե նախագահը չի ուզում: Հիմա գուցե դրվի հանրաքվեի ու չընդունվի այս նածխագիծը, և նախագահն ասի՝ ժողովուրդ էս անգամ ճիշտ ընտրություն ենք կատարում»:
