Բիձինա Իվանիշվիլին պետք է վերադառնա Վրաստանի վարչապետի պաշտոնին. Ալասանիա
Грузия Online-ի փոխանցմամբ՝ Վրաստանի պաշտպանության նախկին նախարար Իրակլի Ալասանիան կարծում է, որ Բիձինա Իվանիշվիլին պետք է վերադառնա կառավարության ղեկավարի պաշտոնին՝ փոխարինելով գործող վարչապետ Իրակլի Գարիբաշվիլուն:
Ալասանիան այդ կերպ է մեկնաբանել Վրաստանի կառավարությունում գրանցված հրաժարականները, որոնք հանգեցրել են կառավարությանը վստահություն հայտնելու անհրաժեշտությանը.
«Եթե Գարիբաշվիլին մնա իր պաշտոնում, ապա դա լուրջ չէ և դրականորեն չի ազդի տնտեսության առողջացման վրա: Միակ ելքը կլինի այն, եթե վերադառնա անձամբ Բիձինա Իվանիշվիլին՝ վերջակետ դնելով ոչ ֆորմալ ղեկավարմանը և երկիրը հասցնի խորհրդարանական ընտրություններին, և հետո արդեն որոշում կընդունի Վրաստանի բնակչությունը»:
