Դավութօղլուն Շուլցի հետ քննարկել է Հայոց ցեղասպանության մասին Եվրոպական խորհրդարանի ընդունած բանաձևը
Թուրքական Anadolu լրատվական գործակալության փոխանցմամբ՝ Թուրքիայի վարչապետ Ահմեթ Դավութօղլուն երեկ հեռախոսազրույց է ունեցել Եվրոպական խորհրդարանի նախագահ Մարտին Շուլցի հետ: Այս մասին լրատվամիջոցին հայտնել են Թուրքիայի կառավարությունում նրա աղբյուրները:
Հեռախոսազրույցի ժամանակ Դավութօղլուն բարձրացրել է Հայոց ցեղասպանության վերաբերյալ Եվրոպական խորհրդարանի ընդունած բանաձևը՝ հայտարարելով, որ այն մերժելի է իրենց համար: Շուլցն իր հերթին հայտարարել է, որ ինքը չի մասնակցել Եվրոպական խորհրդարանի տվյալ նիստին, որում ընդունվել է այդ բանաձևը:
Դավութօղլուն հայտարարել է, որ այդ բանաձևը նախաձեռնողները «ցանկանում են» պատմությունն օգտագործել քաղաքական նպատակներով, և որ այդ բանաձևը կվնասի Թուրքիայի ու ԵՄ-ի հարաբերություններին, «կտապալի» Հայաստանի ու Թուրքիայի միջև հարաբերությունների կարգավորման ուղղությամբ գործադրված ջանքերը:
