Ցեղասպանության վերաբերյալ Էրդողանի կոշտ հայտարարությունները կապված են Թուրքիայի խորհրդարանական ընտրությունների հետ. Մահչուփյան

Ստամբուլի հայկական «Ակօս» թերթին տված հարցազրույցի ժամանակ Թուրքիայի վարչապետ Ահմեթ Դավութօղլուի գլխավոր խորհրդական Էթյեն Մահչուփյանը հայտարարել է, որ Հայոց ցեղասպանության վերաբերյալ նախագահ Ռեջեփ Էրդողանի կոշտ հայտարարությունները կապված են հունիսի 7-ին Թուրքիայում կայանալիք խորհրդարանական ընտրությունների հետ.

«Ընտրություններից առաջ Կենտրոնական Անատոլիայում (Թուրքիայում) գոյություն ունի 4 տոկոսանոց չկողմնորոշված ընտրազանգված, որոնք տատանվում են (իշխող) «Արդարություն ու զարգացում» կուսակցության (ԱԶԿ) ու «Ազգայնական շարժում» կուսակցության (ԱՇԿ) միջև: Հունիսի 7-ի ընտրությունների արդյունքները վճռելու են ապագա 10 տարիները:

Էրդողանի խոսքերով՝ որևէ բան ավելի կարևոր չէ, քան՝ առաջիկա 10 տարիները: ԱԶԿ-ի ընտրազանգվածը կազմում է 22 միլիոն մարդ: Դրա առնվազն 10 միլիոնն ազգայնականներն են: Եթե ԱԶԿ-ը լիներ քվեների 20 տոկոսը ստացող կուսակցություն, ապա այդ ժամանակ շատ հարցերի շուրջ կարտահայտվեր ավելի հստակ:

Սակայն նա քվեների մոտ 50 տոկոսը ստացող զանգվածային կուսակցություն է, և կանգնած է իր ընտրազանգվածի բոլոր հատվածների զգայական կողմը հաշվի առնելու անհրաժեշտության առջև»:

Հայերին թուրքական կողմի ուղերձների հետ կապված՝ Մահչուփյանը հիշեցրել է, որ նախ ԱԶԿ-ը (Էրդողան) հղեց «ցավակցական ուղերձ», ապա Դավութօղլուն ուղերձ հղեց՝ կապված Հրանտ Դինքի մահվան տարելիցի հետ.

«Այս տարվա ապրիլի 24-ի համար կան նման ակնկալիքներ: Դա տեղի կունենա, թե ոչ, չգիտեմ, հետին պլանում կարող են պատրաստվել ինչ-որ բաներ, սակայն ես տեղյակ չեմ դրանից: Եթե անգամ դա տեղի ունենա, ապա տոնը չի լինի շատ տարբեր»:

Անդրադառնալով նրան, որ թուրքական կուսակցությունները հունիսի 7-ի ընտրությունների համար առաջադրել են երեք հայի թեկնածություն՝ Մահչուփյանը ողջունել է այդ քայլը և հույս է հայտնել, որ նրանք երեքն էլ կհասնեն հաջողության:

Ապրիլի 12-ին Վատիկանում Հռոմի պապի մատուցած պատարագի և Հայոց ցեղասպանության վերաբերյալ նրա արած հայտարարության հետ կապված՝ Մահչուփյանը հայտարարել է, որ Հռոմի պապն այս տարի պետք է ինչ-որ բան ասեր 1915 թվականի ցեղասպանության մասին, ինչն էլ նա արել է դիվանագիտական տեսքով: Մահչուփյանը նշել է, որ իր կարծիքով Հռոմի պապն այդ կերպ ձերբազատվել է հոգևոր բեռից և արդարացրել է հասարակական սպասումները:

Հիշեցնենք, որ Էրդողանը նախկինում էլ է աչքի ընկել հայկական գործոնի կիրառմամբ ընտրություններից առաջ ազգայնական ընտրազանգվածի քվեները ստանալու փորձով: Քանի որ Թուրքիայի հայ համայնքը մեծաթիվ չէ, իսկ ազգայնականների թիվը հաշվվում է միլիոններով, ուստիև Էրդողանը նախապատվությունը տալիս է ազգայնականների քվեները խլելուն, նրանց սիրաշահելուն:

2011 թվականի հունիսի 12-ի խորհրդարանական վաղաժամ ընտրություններին ընդառաջ՝ հունվարին, տվյալ ժամանակ Թուրքիայի վարչապետ Ռեջեփ Էրդողանը Սարիղամիշի ճակատամարտի (1914-1915թթ.) հերթական տարելիցի կապակցությամբ այցելեց Կարսի նահանգ և հայ-թուրքական բարեկամությունը խորհրդանշող հուշարձանն անվանեց «այլանդակ»՝ կարգադրելով ապամոնտաժել այն: Ապամոնտաժման գործընթացը մեկնարկել էր նույն թվականի ապրիլի 24-ին՝ Հայոց ցեղասպանության 96-րդ տարելիցին: