Եզրակացրել էի, որ դա նշանակում է՝ արքեպիսկոպոս Տերտերյանը մոտ ապագայում կմիանա Փաշինյանի արշավին. Հակոբ Բադալյան
Քաղաքական վերլուծաբան Հակոբ Բադալյանը Թելեգրամի իր ալիքում առավոտյան գրառում էր կատարել Ամերիկայի Միացյալ Նահանգներում Հայաստանի դեսպան Նարեկ Մկրտչյանի՝ նոյեմբերի 23-ին ԱՄՆ-ում Հայաստանյայց Առաքելական Սուրբ Եկեղեցու Արևմտյան թեմի Սրբոց Ղևոնդյանց առաջնորդանիստ Մայր տաճարում Պատարագի մասնակցության, ապա նաև՝ ԱՄՆ Արևմտյան թեմի առաջնորդ Գերաշնորհ Տեր Հովնան Արքեպիսկոպոս Տերտերյանի՝ դեսպանի պատվին կազմակերպված ճաշի մասին:
«Պատարագի ավարտին Հայաստանյայց Առաքելական Սուրբ Եկեղեցու ԱՄՆ Արևմտյան թեմի առաջնորդ Գերաշնորհ Տեր Հովնան Արքեպիսկոպոս Տերտերյանը դեսպանի պատվին կազմակերպել է ընդունելություն». տեղեկացրել էին դեսպանատնից:
Հակոբ Բադալյանն այդ գրառմամբ կանխատեսել էր, որ այդ տեղեկությունը, թերեւս «հուշում» է հավանականության մասին, որ շատ մոտ ապաագայում ՀԱԵ ԱՄՆ Արեւմտյան թեմի առաջնորդը «կհամալրի» վարչապետ Փաշինյանին միացած բարձրաստիճան հոգեւորականների շարքը:
Ավելի ուշ վերլուծաբանն արդեն գրում է. «Այսօր առավոտյան այս գրառումն արեցի, եզրակացրել էի, որ դա նշանակում է, որ արքեպիսկոպոս Տերտերյանը մոտ ապագայում կմիանա Փաշինյանի արշավին:
Մոտ ապագան փաստորեն եկավ ժամեր անց, եւ քիչ առաջ Վեհափառի հեռանալու անհրաժեշտության վերաբերյալ տարածված հայտարարության տակ տասը եպիսկոպոսների շարքում առկա է նաեւ Հովնան Արքեպիսկոպոս Տերտերյանի անունը»:
