Անթերի աշխատող ռոբոտ և հայ երեխաների տպավորիչ արդյունքը միջազգային հարթակում
Պանամայում կայացած FIRST Global Robotics Championship 2025-ը դարձավ պատմական հաջողություն հայկական «Արմաթ» կրթական ծրագրի սաների համար․ Հայաստանի թիմը զբաղեցրեց 2-րդ տեղը՝ արժանանալով «Լավագույն ինժիներական լուծում» և «Սահուն կառավարում» անվանակարգերի բարձր գնահատականներին։
FIRST Global (IFCA)-ն աշխարհի ամենահեղինակավոր միջազգային ռոբոտատեխնիկայի և ինժեներական մրցույթներից մեկն է, որն այս տարի համախմբել էր 192 թիմ 182 երկրից։ 2025 թվականի թեման՝ «Eco Equilibrium», կենտրոնացած էր ռոբոտատեխնիկայի միջոցով բնապահպանական խնդիրների լուծման վրա։
Հայաստանը ներկայացնող թիմը ձևավորվել էր մարզիչ-խմբավար Էրիկ Միրզոյանի ղեկավարությամբ․
Մարի Օհանյան, Երևան, Դպրոց N131
Դավիթ Ղազարյան, Դվին միջնակարգ դպրոց
Օնիկ Հակոբյան, Գավառ, Դպրոց N2
Վանիկ Մանուկյան, Գավառի ավագ դպրոց
«Մեր ռոբոտն ամեն ինչ անում էր անթերի»․ Օնիկ Հակոբյան
Հրաշալի արդյունքներից հետո թիմի անդամ Օնիկ Հակոբյանը 168.am-ի հետ զրույցում պատմեց մրցույթի առանձնահատկությունների մասին.
«2025 FIRST Global Challenge-ի թեման «Eco Equilibrium» էր։ Էկո-լաբիրինթներում պետք էր վերականգնել էկոհամակարգերը՝ հեռացնելով մեծ գնդակները, որոնք խորհրդանշում էին աղբը, և նետելով փոքր գնդակներ, որոնք ծառայում էին՝ որպես հումուս։ Վերջում ռոբոտը պետք է բարձրանար պարանով։ Մեր ռոբոտն անթերի կատարում էր բոլոր գործողությունները»։
Մրցույթի գլխավոր մարտահրավերն այն էր, որ յուրաքանչյուր խաղում ձևավորվում էին նոր թիմեր՝ կամայական սկզբունքով։ «Շատ անգամ պատահում էր, որ միայն մեր ռոբոտն էր բարձրանում պարանով և կատարում բոլոր առաջադրանքները։ Միավորները հաշվարկվում էին ալիասով՝ ըստ ընդհանուր կատարողականի։ Սակայն, նույնիսկ այս բարդ կանոնների պայմաններում, մենք կարողացանք բարձրանալ մինչև երկրորդ հորիզոնական»,- նշեց նա։
Թիմի համար ամենահիշարժան պահը մրցույթի ավարտին հնչած անսպասելի հայտարարությունն էր, որ Հայաստանը զբաղեցրել է երկրորդ տեղը՝ արժանանալով երկու կարևոր մրցանակի միաժամանակ։
«Սպասում էինք բարձր արդյունքների, որովհետև գիտեինք՝ մեր ռոբոտը տեխնիկապես շատ ուժեղ է։ Ուրախ ենք, որ մեր աշխատանքը գնահատվեց միջազգային չափանիշներով»,- ընդգծեց Օնիկ Հակոբյանը։
Սիրարփի Աղաբաբյան
