Հայ Առաքելական եկեղեցուն միայնակ թողնելու իրավունք չունենք, իսկ այդ եպիսկոպոսները դավաճան են․ Խոսրով Հարությունյան
Եկեղեցու զենքը մեկն է՝ խոսքը, մինչդեռ իշխանության զենքը խոսքը չէ լոկ, այլ իրավապահ մարմինները, բիրտ ուժ կիրառելու գործիքակազմը։ Եկեղեցուն մեղադրել, թե ինչու է միջամտում մեր հանրային կյանքի քաղաքական զարգացումներին, առնվազն մանիպուլյատիվ է։ Եկեղեցին չի կարող անվտանգության հարցերին իմիջիայլոց նայել։ Մեր թեմակալ առաջնորդները չե՞ն գնում արդյոք զոհվածների ընտանիքներ։ Իշխանությունը պետք է զերծ մնա եկեղեցու հանդեպ որևէ ինստիտուցիոնալ ազդեցություն թողնելուց։ Արժեզրկել եկեղեցին, հարվածել նրան, փորձել նրա մեջ առաջացնել ճեղքեր՝ դա ոչ այլ ինչ է, քան ուղղակի հարված հայապահպանության կարևորագույն ազգային ինստիտուտին։ 168TV-ի «#ՕրաԽնդիր» հաղորդման ժամանակ նման կարծիք հայտնեց ՀՀ նախկին վարչապետ Խոսրով Հարությունյանը։
«Եպիսկոպոսաց դասի բոլոր այն ներկայացուցիչները, որոնց թվում է, թե գնում են արդարության հետևից, իրականում պետք է գիտակցեն, որ իրենք դավաճանում են Հայ Առաքելական եկեղեցուն։ Շանտաժի՞ են ենթարկվում, կոմպրոմա՞տ են նրանց դեմ օգտագործում, դժվար է ասել, բայց նրանք դավաճանում են սեփական ժողովրդին։ Հայ Առաքելական եկեղեցուն միայնակ թողնելու իրավունք չունենք։ Այդ եպիսկոպոսներն իրենց վարքագծով ջուր են լցնում Փաշազադեի ջրաղացին։ Այսօր մեջքով շուռ գալ Մայր Աթոռին՝ նշանակում է շարունակել այն թեզը, որն ամրագրում է Փաշազադեն»,- ասաց քաղաքական գործիչը։
«Հասարակության ճնշող մեծամասնությունը չի պաշտպանում այն քաղաքականությունը, որը սրանք իրականացնում են։ Այսինքն, որպես իշխանություն՝ իրենց գործողություններով և անգործությամբ հանրության մի տպավորիչ հատվածի սպասելիքները չեն բավարարում։ Այսօրվա իշխանությունները լեգիտիմության շատ լուրջ դեֆիցիտ ունեն։ Թե՛ քաղաքական գործիչները, թե՛ մտավորականությունը լուրջ անելիք ունեն։ Նրանք պահանջներ պետք է ներկայացնեն, ձևավորեն հանրային օրակարգը։ 1988 թ․-ին հսկայական զանգված դուրս եկավ փողոց, քանի որ Արցախի հայությունը կանգնած էր ցեղասպանության լուրջ սպառնալիքի առջև»,- նշեց Հարությունյանը։
Ընդդիմադիր գործչի կարծիքով՝ Ալիևը Հայաստանի մասին խոսում է՝ որպես ֆաշիստական պետության, մինչդեռ այս տարածաշրջանի միակ ֆաշիստական ռեժիմն Ալիևի ռեժիմն է․ «Հայաստանն այն միակ պետությունն է տարածաշրջանում, որը ելք չունի դեպի ծով, և մեզ խաղաղությունն օդ ու ջրի պես պետք է, որպեսզի մենք կարողանանք ժամանակի ընթացքում դինամիկ և անվտանգ զարգանալ։ Բայց հիմա մենք կանգնած ենք մեր պետականության գահավիժման շեմին։ Մեր բոլորի խնդիրը պետք է լինի այդ գահավիժումը բեկելը կամ կասեցնելը։ Մեր նպատակը ոչ թե պատերազմն է, այլ մեր հարևանների հետ այնպիսի փոխհարաբերությունների ձևավորումը, որոնց պարագայում մեր զարգացումը կբխի նաև նրանց շահերից»:
«Եթե դուք իրականում մտադիր եք Հայաստանը դարձնել խաչմերուկ, ուրեմն արդեն ձեր ներսում բոլոր ենթակառուցվածքները պետք է ոտքի կանգնեցնեք, հատկապես՝ երկաթուղին։ Մինչդեռ «Թրամփի ուղին» Հայաստանին ոչինչ չի տալիս։ Ի՞նչ է, մենք 266 միլիոն դոլար պետք է ներդնենք և այդ հատվածում ժամանակակից երկաթուղի կառուցենք, որ Ադրբեջանը Նախիջևանով հարմարավետ միանա Թուրքիայի՞ն»,- ասաց Խոսրով Հարությունյանը:
Մանրամասները՝ տեսանյութում:
