ԱՄՆ-ը վերացրել է մահացած կուբացիների ու խորտակված նավերի վրա տարածվող իր պատժամիջոցները
Ռուսական ДОЖДЬ հեռուստաալիքի փոխանցմամբ՝ ԱՄՆ ֆինանսների նախարարությունը հրապարակել է Կուբայի հանդեպ պատժամիջոցների ցուցակի նոր տարբերակը՝ դրանից բացառելով մահացած կուբացիներին ու խորտակված նավերը:
Ընդհանուր առմամբ, ցուցակից հանվել է 6 մարդ, որոնցից 4-ը մահացել են, իսկ երկուսն աշխատել են այն ընկերություններում, որոնք դադարեցրել են իրենց գործունեությունը: Բացի այդ, ԱՄՆ-ի պատժամիջոցներն այլևս չեն տարածվում 28 ընկերության ու 11 խորտակված և գործածությունից հանված նավերի վրա:
Պատժամիջոցների ցուցակում ուղղումներն արվել են հատուկ՝ «ոչ այժմեական» անունները հանելու համար: Ներկայումս ԱՄՆ-ի ուԿուբայի հարաբերություններում նկատվում է աստիճանական ջերմացում. երկու երկրները վերականգնել են դիվանագիտական հարաբերությունները:
ԱՄՆ նախագահ Բարաք Օբաման ստորագրել է կղզային պետության հանդեպ քաղաքականության փոփոխման մասին փաստաթղթերը և թուլացրել է տնտեսական բեռնարգելքը՝ թույլատրելով համակարգչային տեխնիկայի ու շինանյութերի մատակարարումը:
