Օդաչուները նորից սկսել են իրենց բողոքի ակցիաները. «Հրապարակ»
«Հրապարակը» գրում է. «Հաշմանդամ օդաչուների միություն» հասարակական կազմակերպության անդամները 4 ամիս լռելուց հետո երեկ նորից հավաքվել էին կառավարության շենքի դիմաց՝ պահանջելով վճարել իրենց հասանելիք փոխհատուցումը։
«Չորս ամիս առաջ վարչապետը մեզ ընդունեց ու անձամբ խոստացավ, որ մինչև մարտի 1-ը մեր խնդիրը կլուծի և փոխհատուցումը կտա, սակայն այդպիսի բան տեղի չունեցավ։Այդ ամիսների ընթացքում մի նամակ, մի ձայն նրանց կողմից չի եղել, իսկ այսօր էլ խիստ զբաղված են և չեն կարոդ մեզ ընդունել»,-ասաց օդաչու Մաքսիմ Հակոբյանը՝ հավելելով, որ խնդրին ծանոթանալուց հետո վարչապետն ասել է, որ իրենց պահանջը ճիշտ է, և պետք է գումարները փոխհատուցվեն։
Տեղեկացնենք, որ օդաչուները 7 տարի պայքարում են փոխհատուցում ստանալու համար, բայց այդպես էլ չեն ստացել, այդ տարիների ընթացքում նրանցից շատերը մահացել են, և 138 օդաչուից մնացել է ընդամենը 50-ը։
«Ամեն օր մեկը մեզանից հեռանում է, օդաչուներս գումար չունենք, որ դեղ առնենք, մենք մեր արդար գումարներն ենք ուզում»,-ասաց մեկ այլ օդաչու՝ Վալերի Համբարձումյանը, ավելացնելով, որ իրենք վարչապետի խոսքին հավատում են, հույս ունեն, որ նրանց կընդունի և կասի, թե ինչ փուլում է փոխհատուցման գործընթացը։ Օդաչու Կարեևև էլ ավելացրեց. «Մենք գիտենք, որ պետության համար էլ են դժվար ժամանակներ, բայց թող ժամանակին մտածեին ու մեզ հասանելիք գումարները չուտեին»։
Կարդացեք օրաթերթի այսօրվա համարում։
