Մադուրոն կոչ է արել ռազմական հանցանքների համար դատել «իմպերիալիստներին»
Noticias24-ի փոխանցմամբ` Վենեսուելայի նախագահ Նիկոլաս Մադուրոն Կարակասում ամերիկյան պատժամիջոցների դեմ անցկացված բողոքի ակցիայի ժամանակ կոչ է արել ռազմական հանցանքների համար դատել «իմպերիալիստներին»: Նա մտադիր է համապատասխան առաջարկով դիմել երկրի Ազգային ժողովին:
Նա ընդգծել է, որ պետք է դատել այն բոլոր «իմպերիալիստներին», որոնք ռմբակոծել են Լիբիան, Իրաքը, Սիրիան ու կործանել են եղբայրական երկրները: Մադուրոյի խոսքերով` ռազմական հանցանքներ գործածների թվում է նաև Իսպանիայի նախկին վարչապետ Խոսե Մարիա Ասնարը.
«Ասնարը մարդասպան է, Ֆրանսիսկո Ֆրանկոյի ֆաշիզմի ժառանգորդը, նա պետք է կանգնի Միջազգային քրեական դատարանի առջև: Նախկին վարչապետ Ասնարը ստել է` պաշտպանելով Ջորջ Բուշ-կրտսերի կեղծիքը, ինչն իր հերթին դարձավ հիմնական շարժիչ ուժը` 2003 թվականին Իրաք ներխուժելու ու ժողովրդին ռմբային հարվածներ հասցնելու համար: Իմպերիալիստական այդ պատերազմի հետևանքով զոհվեց 1.2 միլիոն իրաքցի»:
Դեկտեմբերի 8-ին ԱՄՆ սենատը հաստատեց այն օրինագիծը, որը նախատեսում է արգելել վենեսուելացի այն պաշտոնյաներին վիզա տրամադրելը, որոնք Վաշինգտոնի կարծիքով մասնակից են այս տարեսկզբին Վենեսուելայում գրանցված անկարգությունների ժամանակ մարդու իրավուքնների խախտումներին:
Դեկտեմբերի 13-ին Մադուրոն հայտարարեց, որ այդ պատժամիջոցները միտված են երկրում ռազմական հեղաշրջում հրահրելուն: Նա նաև Վենեսուելայում ԱՄՆ-ի դեսպանատանը մեղադրեց իրեն գահընկեց անելու դավ նյութելու մեջ:
