Կանադան նոր պատժամիջոցներ է սահմանել Ռուսաստանի դեմ
Բրիտանական Reuters լրատվական գործակալության փոխանցմամբ՝ Կանադայի կառավարությունը հաստատել է Ռուսաստանի դեմ նոր պատժամիջոցները, որոնք առնչվել են ռուս 9 քաղաքական գործչի ու գործարարի: Բացի այդ, պատժամիջոցներ են սահմանվել վարկային երկու կազմակերպության՝ Էքսպո բանկի ու Ռուսէներգո բանկի նկատմամբ:
Այս մասին հայտարարել է Կանադայի վարչապետ Սթիվեն Հարփերի գրասենյակը: Հարփերն ընդգծել է, որ Կանադայի կառավարությունը հստակ ցույց տալիս, որ Ուկրաինայի կառավարությանն ահաբեկելու և այդ երկրում իրավիճակն անկայունացնելու ուղղությամբ Ռուսաստանի գործողությունները կունենան հետևանքներ.
«Ուկրաինայի ապօրինի օկուպացիան շարունակվում է, պահպանվում է Ռուսաստանի կողմից ռազմական ագրեսիայի վտանգը: Հենց դրա համար էլ մենք այսօր պատժամիջոցներ ենք սահմանում ևս 9 մարդու ու 2 իրավաբանական անձի նկատմամբ»:
Նշվում է, որ Կանադայի սահմանած նոր պատժամիջոցներն առնչվել են նաև Ռուսաստանի լիբերալ-դեմոկրատական կուսակցության առաջնորդ Վլադիմիր Ժիրինովսկուն ու ՌԴ Պետդումայի՝ միջազգային հարցերով հանձնաժողովի նախագահ Ալեքսեյ Պուշկովին:
