81,5 միլիոն դրամից՝ 224.000 դոլարից ավելի գումար է հատկացվել Տիկնիկային թատրոնին՝ Կապանում Անկախության օրը նշելու համար
Հայաստանը սեպտեմբերի 21-ին կնշի Անկախության 35-րդ տարեդարձը։ Կրթության, գիտության, մշակույթի և սպորտի նախարարությունը որոշել է Անկախության օրվա առիթով սեպտեմբերի 19-ին միջոցառում կազմակերպել Կապան համայնքում։
Այս նպատակով «Ազգային տիկնիկային թատրոնը» 81 միլիոն 540 հազար դրամ կստանա ԿԳՄՍ նախարարությունից՝ դրամաշնորհի տեսքով։ Համապատասխան պայմանագիրը կողմերը կնքել են սեպտեմբերի 4-ին։
ՊՈԱԿ-ն այս գումարով նախատեսում է «Անկախության օրը Կապանում» համերգային ծրագիր իրականացնել՝«Դո ֆա մի», «Ռեդ լայն», «Ռեինկարնացիա» և «Նեմրա» երաժշտական խմբերի մասնակցությամբ։ Պայմանագրից տեղեկանում ենք՝ միջոցառումը նշելու են սեպտեմբեր 19-ին, միջոցառման մասնակիցների և հանդիսատեսի ակնկալվող թիվն առնվազն 7,000 մարդն է։
Նշվում է, որ սրանով Սյունիքի մարզի բնակիչներն ու հյուրերը հնարավորություն կունենան մասնակցելու մշակութային և համերգային միջոցառմանը՝ իրենց համայնքում, կընդգծվի Կապան քաղաքի դերը, որպես Հայաստանի Հանրապետության կարևոր մշակութային կենտրոններից մեկի՝ խթանելով մարզերում մշակութային կյանքի զարգացումն ու ապակենտրոնացումը, և այլն։
Հիշեցնենք՝ 168․am-ն առիթ ունեցել է տեղեկացնելու, որ ՊՈԱԿ-ի տնօրենն Արտաշես Բաբայանն է, որը հայտնի է ոչ միայն՝ նախկին տնօրեն, այժմ՝ թատրոնի գեղարվեստական ղեկավար Ռուբեն Բաբայանի որդին լինելու հանգամանքով, այլև 2018 թվականից առ այսօր Նիկոլ Փաշինյանին սատարելու պատճառով։
2022 թվականից է Արտաշես Բաբայանը զբաղեցնում է ՊՈԱԿ-ի տնօրենի պաշտոնը։ Նրա նշանակումը, ըստ պետգնումների armeps համակարգի, նաև «բարեբեր» է եղել թատրոնի համար․ իրար հետևից դրամաշնորհներ ու մեկ անձ գնման ընթացակարգով բազմաթիվ պայմանագրեր են կնքվել թատրոնի հետ։ Ինչի մասին մենք դեռ առաջիկայում առիթներ կունենանք դարձյալ արձանագրումներ անելու։
