ՀՀԿ-ական պատգամավոր. «Պարոն Բագրատյանի, այսպես ասած, կուկարիկուների և հարցադրումների մեջ մի փոքր վիրավորական ենթատեքստ կա»
«Դ!ԵՄ ԵՄ» նախաձեռնությունն այսօր Ազատության հրապարակում անցկացրեց հերթական հավաքը` ընդդեմ պարտադիր կենսաթոշակային կուտակային համակարգի: Շարժման մասնակիցները, քաղաքացիները հարթակից հայտարարեցին, որ վճռական են տրամադրված և շարունակելու են պայքարել, քանի դեռ Սահմանադրական դատարանը չի կասեցրել «Կուտակային կենսաթոշակների մասին» օրենքի պարտադիր դրույթները:
Հանրապետական կուսակցության անդամ, Ազգային ժողովի «Հանրապետական» խմբակցության քարտուղար Հովհաննես Սահակյանը 168.am-ի հետ զրույցում գնահատելով այսօրվա հանրահավաքը, ասաց, թե մշտապես կողմ է եղել ակտիվ քաղաքացիական գործունեությանը, որը համարում է ժողովրդավարության կարևորագույն ինտիտուտն է, սակայն, իր կարծիքով, կառավարության գործունեությանը «թալան» կամ նման ձևակերպումներ տալը քաղաքականացնում է խնդիրը:
«Երբ մենք գնում ենք այդեն այդ ձևակերպումներին` «ոչ թալանին» և այլն, այստեղ ես ստիպված եմ տալ քաղաքական պատասխան և հարցը լինելու է քաղաքական: Բնական է, որ միշտ ընդդիմությունն է գոռում`«ոչ թալանին», «ոչ կոռուպցիային»: Իմ վերջին հարցազրույցում ես նշել էի` եթե կուտակային համակարգին դեմ նախաձեռնության կողմից էս, էս կետերի շուրջ կա որևէ զիջում, բանակցություն, քննարկում, մենք պատրաստ ենք գալ, նստել, քննարկել:
Բայց եթե տոնայնությունը գնում է դեպի «ոչ թալանին» և նման ձևակերպումներին, ապա սա միանշանակ արվում է նրա համար, որպեսզի ավելի շատ հուժկու լինի, ինչպես ձևակերպում են որոշ քաղաքական գործիչներ: Սա մի քիչ այլ հարթության մեջ է: Եթե այս դաշտ մտանք, մենք սկսելու ենք քաղաքական մեր անդրադարձները, դրա համար ևս մեկ անգամ հորդորում ենք, որ մնան քաղաքացիական ակտիվության դաշտում»,- ասաց Հովհաննես Սահակյանը:
Միաժամանակ նա կարծիք հայտնեց, թե որևէ բարեփոխում` առանց համախոհների և դեմ հանդես եկող մարդկանց և ընդվզման չի լինում:
«Եթե մենք մնում ենք քաղաքացիական ակտիվիստների տիրույթում, ապա բարձրացրել էին խնդիր` պարտադիր բաղադրիչը, մեկ այլ բաղադրիչ հանվի: Բարեկամ, եկեք խոսենք այդ մասին, եկեք փուլ առ փուլ հասկանանք` ձեր առաջարկությունը կտրուկ պարտադի՞րն է, թե՞ ոչ: Դիմել են կառավարությանը, հուսով եմ` կառավարությունը կտա դրա պատասխանը` պատրաստ է, թե ոչ,- նշեց Հովհաննես Սահակյանը: -Պետք է ասեմ հետևյալը` կուտակային պարտադիր կենսաթոշակային բարեփոխումը օրհասական է, պետք է մեր ժողովրդին` այս պահի դրությամբ: Աշխարհում որևէ այլ մոդել, մի փոքր տարբերություններով, չկա, որևէ մեկը ավել արդարացված մոդել չի ընտրել: Կա տարբեր երկրների տարբեր փորձ. ասենք` մի տեղ պարտադիր բաղադրիչն է հանած, բայց սկզբնական ժամանակաշրջանում մեծ մասի մոտ, երբ անցում են կատարում, պարտադիր բաղադրիչը եղել է: Սրանք այն հարցերն են, որոնց մասին միանշանակ կարելի է խոսել»:
Հիշեցրինք՝ տնտեսագետ, ԱԺ «ՀԱԿ» խմբակցության պատգամավոր Հրանտ Բագրատյանի այսօրվա ելույթի խոսքերը, որտեղ նա բարեփոխումն անվանեց «կատարյալ հիմարություն»` հայտարարելով, թե աշխարհի որևէ երկրում 45 տարով կենսաթոշակային հիմնադրամ չկա:
«Ես հիմա մի բան եմ ասում ու եթե վարչապետն ասի, որ նման բան չկա, ես ներողություն կխնդրեմ: Նման բան աշխարհում չկա, չի կարելի մեզ նվաստացնել, սա ռեֆորմ չէ, հիմարը նա է, ով սա ներդնում է: 45 տարով նման գործիք աշխարհում չկա, եթե մենք ֆինանսավորում ենք անգամ դեպի Մարս թռչող արբանյակը: 20 տարուց ավել չեն տարիս պարտք, 45 տարին նոնսենս է, գինեսի ռեկորդ, կատարյալ հիմարություն: Առաջարկում եմ՝ թող ասեն, որ սենց բան կա աշխարհում ու ես տելեվիզրով կուկարիկու կկանչեմ»,- ասաց Հրանտ Բագրատյանը:
Մեկնաբանելով Հրանտ Բագրատյանի այս հայտարարությունը` Հովհաննես Սահակյանը նշեց. «Քանի որ պարոն Բագրատյանի, այսպես ասած, կուկարիկուների և հարցադրումների մեջ մի փոքր վիրավորական ենթատեքստ կա, չանդրադառնամ և հորդորեմ, որ մնանք կոռեկտության և փոխադարձ հարգանքի տիրույթում, այլապես իմ կողմից որևէ պատասխան պետք է լինի բացառապես վիրավորանք»:
