Ռուս զինվորականները Տաջիկստանում կմնան մինչև 2042 թվականը
Ռուսական РИА Новости լրատվական գործակալության փոխանցմամբ՝ Ռուսաստանը 2005 թվականից Տաջիկստանին հատկացրել է մոտ 411 միլիոն դոլարի ռազմատեխնիկական օգնություն: Այս մասին խորհրդարանի այսօրվա նիստում հայտարարել է Տաջիկստանի պաշտպանության նախարար Շերալի Հայրուլաևը:
Վերջինիս խոսքերով՝ 2005 թվականից Ռուսաստանը Տաջիկստանի բանակի համար պատրաստել է ավելի քան 2000 սպա, և ներկայումս ռուսական ռազմական բուհերում անվճար ուսանում է Տաջիկստանի 500 քաղաքացի:
Տաջիիկստանի խորհրդարանն այսօր վավերացրել է երկրի տարածքում ռուսական ռազմաբազայի կարգավիճակի վերաբերյալ համաձայնագիրը: Փաստաթղթի համաձայն, ռուս զինվորականները Տաջիկստանում կմնան մինչև 2042 թվականը:
Ընդ որում, երեսնամյա ժամկետի սպառվելուց դեպքում պայմանագիրը կարող է երկարաձգվել յուրաքանչյուր 5 տարին մեկ: Համաձայնագիրը ստորագրվել է 2012 թվականի հոկտեմբերին: Այն ուժի մեջ կմտնի նախագահի ստորագրությունից հետո:
