Ռուսաստանը Սիրիայում անցկացնում է քիմիական զենքի կիրառման շուրջ իր հետաքննությունը. Լավրով
Ռուսական РИА Новости լրատվական գործակալության փոխանցմամբ՝ Ռուսաստանի արտգործանախարար Սերգեյ Լավրովն այսօր Մոսկվայում լրագրողների հետ զրույցում հայտարարել է, որ Ռուսաստանը հետաքննում է օգոստոսի 21-ին Դամասկոսի մոտ քիմիական զենքի կիրառումը՝ մեղավորներին հայտնաբերելու համար.
«Մենք իրականացնում ենք մեր սեփական հետաքննությունը՝ ստանալու համար առավելագույն տեղեկատվություն, թե ով է մասնակից այդ վրդովեցուցիչ արարքին: Ամեն դեպքում մենք հասնելու ենք նրան, որ մեղավորները պարզվեն: Այդ հարցերի քննարկումն անհրաժեշտ է անցկացնել ՄԱԿ ԱԽ-ում՝ օգտագործելով ողջ փաստերը:
Ռուսաստանը շահագրգռված է, որպեսզի անկողմնակալ հետաքննություն անցկացվի քիմիական զենքի կիրառման յուրաքանչյուր հաղորդման գծով, ինչպես նաև, որ հայտնաբերվեն մեղավորները: ՄԱԿ-ի՝ քիմիական զենքի գծով փորձագետները Սիրիա կատարած երկրորդ այցի ժամանակ նույնպես չեն այցելել Հալեպի մոտ գտնվող Խան ալ-Ասալ բնակավայր, ուր հաղորդվել է (ապստամբների կողմից) քիմիական զենքի կիրառման մասին»:
