Սննդամթերքի անվտանգության ծառայությունը կրկին նմուշառում է կատարել «Նարինե» արտադրատեսակներից
Ինչպես արդեն տեղեկացրել էինք, ՀՀ գյուղատնտեսության նախարարության Սննդամթերքի անվտանգության ծառայության պետի հրամանով օրերս արգելվել է «Պանացեա» ՍՊԸ-ի կողմից «Նարինե կաթնաթթվային մթերք» և «Նարինե բակտերիալ խտանյութ» արտադրատեսակների արտադրությունը:
«Պանացեա» ընկերության տնօրեն Անի Թովմասյանն այսօր 168.am-ի հետ զրույցում ասաց, որ Սննդամթերքի անվտանգության ծառայությունը կրկին նմուշառում է կատարել արտադրատեսակներից. արդյունքները դեռ հայտնի չեն: Ըստ նրա՝ քանի որ տարածված տեղեկատվությունը վնաս է հասցրել ընկերության հեղինակությանը, իրենք դիմել են շատ ավելի լուրջ և ավելի մանրամասն փորձաքննության. «Շատ ավելի խորը, մանրամասն ուսումնասիրություն ենք կատարել՝ թե´ արտադրամասի, թե´ պրոցեսի, թե´ միկրոբիոլոգիայի հետ կապված»:
Անի Թորոսյանն ասաց, որ իրենց ուսումնասիրությունն արվում է Հայաստանում գրանցված լաբորատորիայում, միևնույն ժամանակ՝ համագործակցում են նաև եվրոպական որոշ ընկերությունների հետ:
Սննդամթերքի անվտանգության պետական ծառայությունը նաև հրահանգներ էր տվել «Պանացեա» ընկերության տնօրենին հայտնաբերված խախտումները վերացնելու համար: Անի Թորոսյանն ասաց, որ այն բանից հետո, երբ ինքը նամակ էր ուղարկել ծառայությանը և նշել, որ հայտնաբերված խախտումները վերացվել են, ծառայության աշխատակիցներն այցելել են ընկերություն. «Եկել են ու գրանցել, որ տեխնիկական թերությունները լուծված են: Կարծում եմ՝ իրենք էլ սպասում են իրենց լաբորատորիաների արդյունքներին»:
