Դամասկոսը սկզբունքորեն համաձայնվել է մասնակցել Սիրիայի վերաբերյալ միջազգային կոնֆերանսին. ՌԴ ԱԳՆ
Ռուսական ИТАР-ТАСС լրատվական գործակալության փոխանցմամբ՝ Դամասկոսից ստացվել է սիրիական կառավարության սկզբունքային համաձայնությունը՝ Սիրիայի վերաբերյալ միջազգային կոնֆերանսին մասնակցելու համար: Այս մասին այսօր հայտարարել է Ռուսաստանի ԱԳՆ-ի պաշտոնական ներկայացուցիչ Ալեքսանդր Լուկաշևիչը.
«Սիրիական իշխանությունները պատրաստ են մասնակցել միջազգային կոնֆերանսին՝ սիրիացիների կողմից երկրի ու տարածաշրջանի համար կործանիչ հակամարտության կարգավորման ուղիները գտնելու համար:
Նման հանդիպման անցկացումն իրական հնարավորություն է ընձեռում դադարեցնել արյունահեղությունն ու սիրիացիների տառապանքները, Սիրիային ապահովել խաղաղ, ժողովրդավար ապագա: Այդ հնարավորությունը չպետք է բաց թողնվի:
Մոսկվան հուսով է, որ սիրիական ընդդիմությունը կորոշի առանց նախապայմանների մասնակցել «Ժնև 2» կոնֆերանսին: Առավել անհետաձգելի առաջադրանք է հանդիսանում առանց նախապայմանների ընդդիմության բանակցային թիմի ձևավորումը՝ ֆորումին մասնակցելու համար»:
