ԵԽԽՎ նախագահը մայիսի 26-ին կժամանի Ադրբեջան
Ադրբեջանական APA լրատվական գործակալության փոխանցմամբ՝ ԵԽԽՎ նախագահ Ժան Կլոդ Մինյոնը մայիսի 26-ին պաշտոնական այցով ժամանում է Ադրբեջան: Այս մասին հայտնել է ԵԽԽՎ-ի մամուլի ծառայությունը:
Իր ադրբեջանական այցի շրջանակներում Մինյոնը հանդիպումներ է ունենալու Ադրբեջանի նախագահի, խորհրդարանի նախագահի, արտգործնախարարի, խորհրդարանում ներկայացված քաղաքական կուսակցությունների առաջնորդների, խորհրդարանական հանձնաժողովների մի շարք անդամների հետ:
Ակնկալվում է նաև, որ Մինյոնը հանդիպումներ է ունենալու հասարակական կազմակերպությունների ներկայացուցիչների հետ: Այդ հանդիպումներում կողմերը քննարկելու են ԵԽ-ի ու Ադրբեջանի միջև համագործակցության հարցը:
Մինյոնի ադրբեջանական այցն ավարտվելու է մայիսի 28-ին: Նշվում է, որ Ադրբեջանից հետո Մինյոնն այցելելու է նաև Վրաստան ու Հայաստան:
