Վրացի հրշեջներին հաջողվել է կանխել Հայաստանից 30 տոննա կոնյակ տեղափոխող բեռնատարի պայթյունը
Ռուսական РИА Новости լրատվական գործակալության փոխանցմամբ՝ վրացի հրշեջները կարողացել են օպերատիվ արձագանքել «Ռուիս» թունելում այսօր առավոտյան գրանցված հրդեհին: Թունելում այրվել էր Հայաստանից 30 տոննա կոնյակ Փոթի տեղափոխող բեռնատարը:
Այս մասին լրագրողների հետ զրույցում հայտարարել է Գորիի շրջանի հրշեջ ծառայության պետ Մամուկա Իմերլիշվիլին. «Մեր աշխատակիցները ժամանակին կարողացան մարել հրդեհը և դրանով իսկ կանխել պայթյունը, որը քիչ վնաս չէր պատճառի: Թրեյլերի վարորդ Մալխազ Ռուխաձեին հաջողվել է լքել այրվող մեքենան»:
Վրացական «Մաեստրո» հեռուստաալիքը հայտնել է, որ հրդեհը վնասել է թունելի հաղորդագծերը: Հրդեհի պատճառով թունելով երթևեկությունը կաթվածահար է եղել: Նշվում է, որ կոնյակի խմբաքանակը, որը որոշակի տվյալներով չի հանդիսացել Երևանի կոնյակի գործարանի արտադրանք, պետք է Փոթիով ուղարկվեր Ռուսաստան:
