Դատախազությունն այսօր ստացել է Փաստաբանների պալատի նախագահի դիմումը
Այսօր ՀՀ գլխավոր դատախազություն է մուտք եղել ՀՀ փաստաբանների պալատի նախագահ Ռուբեն Սահակյանի դիմումը փաստաբան Լուսինե Սահակյանի նկատմամբ սպառնալիքներ ու վիրավորական արտահայտություններ հնչեցնելու փաստի առթիվ քրեական գործ հարուցելու խնդրանքի մասին:
Ինչպես «Փաստինֆո»-ի թղթակցին հայտնեց ՀՀ գլխավոր դատախազի խորհրդական Սոնա Տռուզյանը, դիմումին օրենքով սահմանված կարգով ու ժամկետներում ընթացք կտրվի:
Հիշեցնենք, որ Գյումրու նախկին քաղաքապետ Վարդան Ղուկասյանի դստեր փեսացուի սպանության գործով Շիրակի մարզի ընդհանուր իրավասության դատարանում ընթացող դատաքննության շրջանակում ապրիլի 5-ի դատական նիստում իր մասնագիտական գործունեության կապակցությամբ սպառնալիքներ ու վիրավորական արտահայտություններ էին հնչել փաստաբան Լուսինե Սահակյանի հասցեին: Լուսինե Սահակյանը սպանությունը կատարելու մեջ մեղադրվող, գործով ամբաստանյալ Հարություն Սարգսյանի պաշտպանն է:
