Ամերիկացին գողացել է անվճար տրվող կարկանդակներ
Ամերիկյան Associated Press լրատվական գործակալության փոխանցմամբ՝ Պիտսբուրգի բնակիչ Ուիլյամ Դևենպորտը գողացել է անվճար տրվող կարկանդակներ: Նա հերթ է կանգնել տվյալ կարկանդակները ստանալու համար, սակայն չսպասելով իր հերթի հասնելուն, որոշել է ինքնուրույն յուրացնել դրանք:
Դևենպորտը լքել է իր հերթը, մոտեցել է տվյալ շինության պահեստին, ուր գտնվել են բաժանման համար պատրաստ կարկանդակները և գողացել է միանգամից 4 կարկանդակ: Դրանցից յուրաքանչյուրն արժե 27 դոլար:
Սակայն Դևենպորտի այդ քայլը չի վրիպել քաղաքացիների աչքից, ինչն էլ հանգեցրել է նրան, որ ոստիկանությունը ձերբակալել է Դևենպորտին: Վերջինս ներողություն է խնդրել իր արարքի համար՝ հայտարարելով, որ գտնվել է ալկոհոլի ազդեցության ներքո:
Նրա այդ քայլը մեծ հնչեղություն է ունեցել, քանի որ մարդիկ մի քանի ժամ հերթ են կանգնել՝ իրենց հասանելիք անվճար կարկանդակները ստանալու համար: Ամերիկյան լրատվամիջոցը չի հայտնել, թե ձերբակալվելուց հետո ինչպիսին է եղել Դևենպորտի ճակատագիրը:
