Թող այլևս չթափվի արյան անգամ մեկ կաթիլ. Օջալանի ծննդյան ուղերձը
Ռուսական РИА Новости լրատվական գործակալության փոխանցմամբ՝ այսօր իր 64 տարին բոլորած քուրդ առաջնորդ Աբդուլլահ Օջալանը, ով 1999 թվականից ցմահ ազատազրկում է կրում Մարմարա ծովի Իմրալը կղզում, բանտ այցելած պատգամավորների միջոցով նոր ուղերձ է հղել իր համակիրներին, որում հերթական անգամ կոչ է արել վերջ դնել արյունահեղությանը.
«Քրդական հարցի խաղաղ կարգավորման հնարավորությունները շատ մեծ են: Դա ամենակարևորն է, որ մենք կարող ենք առաջարկել մեր մարդկանց: Բոլորեց իմ 64-րդ տարին: Ես արել եմ այն, ինչ կարողացել եմ: Թող այլևս չթափվի արյան որևէ կաթիլ: Թող բոլորն իմանան, որ այսուհետ սկսվում է նոր կյանք»:
Հիշեցնենք, որ երեկ Թուրքիայի խորհրդարանի պատգամավորական պատվիրակությունը բանակցելու նպատակով մեկնել էր Մարմարա ծովի Իմրալը կղզի: Այդ այցը տեղի է ունեցել նախապես որոշված ժամկետից շուտ:
Մասնավորապես, պլանավորված էր, որ այդ այցը պետք է տեղի ունենար շաբաթվա վերջին՝ Օջալանի ծննդյան օրվանից (ապրիլի 4) հետո: Թուրք պատգամավորների այս անսպասելի այցը տարատեսակ կարծիքների տեղիք է տվել: Մասնավորապես, չէր բացառվում, որ Օջալանը նոր կոչ է պատրաստել իր ծննդյան օրվա կապակցությամբ: