Էլեկտրոսրտագրի ժապավենի սխալ մեկնաբանումը հիվանդի մահվան պատճառ
Շուրջ 1,5 տարի է, ինչ Արարատ և Վայոց ձոր մարզերի ընդհանուր իրավասության դատարանում շարունակվում է անեսթեզիոլոգ Ալեքսանդր Ֆանյանի քրեական գործով դատավարությունը։ Վերջինս մեղադրվում է մասնավորապես մասնագիտական պարտականությունները ոչ պատշաճ իրականացնելու մեջ, որի հետևանքով հիվանդը մահացել է։
Ալեքսանդր Ֆանյանն աշխատելով «Վեդի» ԲԿ-ում որպես անեսթեզիոլոգ 2011թ. հունվարի 11-ին ժամը 21:30-ի սահմաններում իրականացրել է «օղակված ճողվածք» հիվանդությամբ հիվանդանոց ընդունված Արալեզ գյուղի բնակիչ Գ.Ավետիսյանի բժշկական օգնությունը և սպասարկումը: Նրան առաջադրված մեղադրանքի համաձայն՝ Գ.Ավետիսյանին վիրահատությանը նախապատրաստելիս անեսթեզիոլոգը սխալ է մեկնաբանել էլեկտրոսրտագրի ժապավենը, այլ խոսքով դրսևորել է անփույթ վերաբերմունք, որի հետևանքով անզգուշությամբ առաջացրել է Գ.Ավետիսյանի մահը:
Ա. Ֆանյանը մեղադրվում է ՀՀ քրեական օրենսգրքի 130-րդ հոդվածի 2-րդ մասով։ Տուժողի մահից անցել է երկու տարի, իսկ մեղավորների գործողություններին վերջնական գնահատական տրված չէ։ Միակ մեղադրյալի նկատմամբ որպես խափանման միջոց է ընտրվել չհեռանալու մասին ստորագրությունը ու 2011 թվականի աշնանից դատարանի վարույթում գտնվող քրեական այս գործով դատական նիստերը շարունակվում են։
