«Մենաշնորհը դա այն շնորհն է, որին ես ամեն դեպքում դեմ եմ»
Ասում է ԲՀԿ-ական պատգամավոր Բազմասեր Առաքելյանը
– Պարոն Առաքելյանը, այսօր ԱԺ նիստին Ձեր խմբակցությունից ներկա էին ընդամենը մի քանի պատգամավորներ: Ինչո՞վ է պայմանավորված մյուս պատգամավորների բացակայությունը:
– Ամեն մեկն իրա հարցերով, իրա օրենսդրական խնդիրներով ա զբաղված: Դե դուք գիտեք, մեր պատգամավորներից ահագին մարդ գործուղման մեջ ա:
– Քանի՞ հոգի:
– Չորս են, հինգ են, մնացածն էլ զբաղվում են իրենց օրենսդրական աշխատանքներով՝ իրենց առանձնասենյակներում:
– Երեկ Բրյուսելում ԲՀԿ նախագահը հայտարարություն արեց երկրի կոռումպացված լինելու մասին: Ինչպե՞ս եք գնահատում այդ հայտարարությունը: Արդյո՞ք դա ՀՀԿ-ի դեմ էր ուղղված:
– Գագիկ Ծառուկյանը հանդիսանում է հանրապետության քաղաքական երկրորդ ուժ: Դե հիմա մարդը գտել ա նպատակահարմար, որ հայտարարել ա: Երևի մեր գործընկերը ճիշտ ասեց՝ համբերության բաժակը լցվել ա: Դե ես հիմա չեմ կարա ասեմ՝ համբերության բաժա՞կն ա լցվել, թե՞ ինչ, բայց ինքն իրավունք ունի, քաղաքական լուրջ գործիչ ա, ինքը մտահոգվում ա, մտածում ա ժողովրդի մասին:
– Իսկ ըստ Ձեզ՝ մեր երկիրը կոռումպացվա՞ծ է:
– Էդ դուք ինձնից ավելի լավ գիտեք:
– Ձեր գնահատականն ու մեկնաբանությունն է հետաքրքիր:
– Իմ գնահատականն այն է, որ այս պահի դրությամբ՝ մեր երկրի համար, համենայնդեպս, էդ չի հիմնական ցավը: Մեր երկիրն էլի ահագին պրոբլեմներ ունի, որ պիտի մտածենք դրանց մասին: Էդ էլ պրոբլեմ ա, բայց հիմա լիքը պրոբլեմներ ունենք:
– Կնշե՞ք դրանցից մի քանիսը:
– Հիմա՞, հիմա՝ ոչ:
– Ինչո՞ւ:
– Հիմա, ճիշտն ասած, ես շուտ եմ համարում խոսել նման բաների մասին: Տարի ենք փակում, տարին փակենք, թազա տարվա մեջ կխոսենք:
– Նախընտրական քարոզչության շրջանո՞ւմ:
– Չէ, նախընտրականը կապ չունի դրա հետ: Վերջը, տարին փակենք, մյուս տարվա մեջ կխոսենք:
– Այս ժամանակահատվածում քաղաքական դաշտի ամենամեծ ինտրիգը Գ. Ծառուկյանի առաջադրման հարցն է: Ի՞նչ եք կարծում՝ եթե Գ Ծառուկյանն առաջադրի իր թեկնածությունը, արդյոք նա կհաղթի՞:
– Թող առաջադրվի, ժամանակը ցույց կտա, եթե, իհարկե, կառաջադրվի: Ոչ մի պաշտոնական հայտարարություն դեռ չի արվել, երբ կարվի, էդ հարցը կտաք, ես կպատասխանեմ:
– Վերջին շրջանում ԲՀԿ-ն փոխել է իր մարտավարությունը և հանդես է գալիս կառավարության քննադատությամբ: Դուք ԲՀԿ-ին համարո՞ւմ եք ընդդիմություն:
– Հիմա ոչ մի բան չի փոխվել, մի բանն ա փոխվել՝ Ազգային ժողովի ընտրություններից և մեր քարոզարշավից հետո ժողովրդին խոստացել ենք, որ երկիրը գլոբալ փոփոխություններ է ուզում, ժողովուրդը գլոբալ փոփոխություններ է ուզում, բայց քանի որ գլոբալ փոփոխություններ չեն նկատվում, դրա համար մենք քվեարկում ենք էն օրենքները, որոնք բխում են և ժողովրդի շահերից:
– Գլոբալ փոփոխություն ասելով՝ նկատի ունեք իշխանափոխությո՞ւնը:
– Ոչ, մենք չենք գնում իշխանափոխության, հեղափոխության: Մենք մտածում ենք ժողովրդի մասին, որ ժողովուրդն իրա մի կտոր հացը վաստակի, արժանապատիվ ապրի: Մենք դրա մասին ենք մտածում:
– Երեկ ՀԱԿ-ն ԱԺ քննարկմանը ներկայացրեց հակամենաշնորհային փաթեթ: Դե՞մ եք մենաշնորհի վերացմանը, թե՞ կողմ:
– Իհարկե, մենաշնորհը դա այն շնորհն է, որին ես ամեն դեպքում դեմ եմ:
– Ձեր կուսակցության մեջ կա՞ն մարդիկ, ովքեր մենաշնորհ ունեն:
– Ոչ:
– Այսքան ժամանակ ի՞նչ օրենսդրական նախաձեռնությամբ եք հանդես եկել:
– Գիտեք, ես նոր ընտրված պատգամավոր եմ, առայժմ՝ ոչ մի, բայց ես, մինչև իմ պատգամավորական ժամանակահատվածը վերջացնելը, ահագին օրենքներով հանդես կգամ: Այն օրենքները կլինեն, որոնք, էլի եմ կրկնում, կբխեն ժողովրդի շահերից, և ինձ թվում ա՝ մեր երկիրը բարգավաճացնող օրենքներ կբերեմ Ազգային ժողով:
– Օրինակ, ո՞րն է Ձեր հետաքրքրությունների շրջանակը: Ի՞նչ օրենսդրական նախաձեռնություն կցանկանայիք բերել ԱԺ:
– Երբ կներկայացնեմ, էդ օրենքի մասին կխորանանք:
– Չեմ հարցնում՝ ե՞րբ, հարցնում եմ՝ ի՞նչ:
– Դե ասեցի՝ երբ կներկայացնեմ, ես ամեն դեպքում էս պահի դրությամբ մտածում եմ, որ մեր երկիրը բարելավվի, մեր ժողովուրդը լավ ապրի: Եվ նպաստում եմ այն օրենքներին, որոնք բխում են ժողովրդի շահերից: Մենք մեր կուսակցությունով, մեր կուսակցության ղեկավարի շնորհիվ՝ որդեգրել ենք մի քաղաքականություն՝ ամեն օրվա մեր աշխատանքով իրականացնել մեր ծրագրերը:
– Ի դեպ, պարոն Առաքելյան, կպատմե՞ք Ձեր անվան նախապատմությունը: Ինչո՞ւ Ձեզ անվանեցին Բազմասեր:
– Բազմիցս անդրադարձել եմ, և ահագին մարդկանց մոտ է հետաքրքրություն առաջացրել իմ անունը: Ես միանգամից ասեմ՝ Բազմասեր եղել ա իմ պապի անունը, որը որ մարզիկ ա եղել, և ո՞նց Ձեզ բացատրեմ՝ որտեղի՞ց ա եկել: Պապուս անունն էլ դրել ա իր հայրը: Մենք, ոնց որ ասած, սպորտային ընտանիք ենք: Մեր ընտանիքը պապիցս սկսել և զարգացրել ա ազատ ըմբշամարտը: Պապս եղել ա Անդրկովկասյան խաղերի բազմակի հաղթող, Սովետական Միության հաղթող և հանդիսացել է էդ սպորտաձևը զարգացողներից մեկը մեր տարածաշրջանում: Երբ ես ծնվեցի, հայրս որոշեց պապիս անունը դնի իմ վրա, որ ես շարունակեմ: Ես շարունակեցի, և ինքս էլ եղել եմ մոտ 12 տարի հավաքականի անդամ, բազմակի մասնակից եմ եղել Եվրոպայի աշխարհի առաջնություններին, ցավոք, հաղթող չեմ ճանաչվել, բայց իմ գենով եկել ա էդ սպորտաձևը: Ես իմ անունից վատ չեմ զգում: Ես եզակի անուններ սիրում եմ, բայց իմ տղայի վրեն չեմ թողնի դնեն էդ անունը:
– Ինչո՞ւ:
– Ինձ թվում ա, որ արդեն հերիք ա, էլի, ես պապուս բռնած գործը շարունակեցի, հիմա չեմ ուզում, որ իմ գործն իմ տղեն շարունակի: Ոնց որ ասում են, թող էդ անունը մնա մենակ իմ վրեն:
– Պարոն Առաքելյան, Ձեր ո՞ր արժանիքի համար եք գտնվում Ազգային ժողովում:
– (Ծիծաղում է.- Մ.Մ.): Բայց պրովոկացիոն հարցերդ մի քիչ շատ էին: Գնահատողը ես չեմ, եթե ես համամասնական ցուցակով եմ եկել, կուսակցությունն է գնահատել: Ուրեմն, գտել է նպատակահարմար, որ ես պետք եմ Ազգային ժողովում՝ թե՛ կուսակցությանը, թե՛ ժողովրդին, լավ օրենքներ բերել և ծառայել՝ ի շահ ժողովրդի:
