«Գեգամետ պլյուսը» մտադիր է Սևանա լճի ափին մոտ բաց եղանակով հանքավայր շահագործել
«Գեգամետ պլյուս» ընկերությունը մտադիր է Սևանա լճի ափին մոտիկ, մոտ 120 հա տարածքում բաց եղանակով շահագործել Շորժայի մագնեզիումասիլիկատային ապարների և քրոմիտների հանքավայրը: Հանքավայրի շահագործման աշխատանքային նախագծի վերաբերյալ շրջակա միջավայրի վրա ազդեցության հասարակական լսումներ տեղի կունենան հոկտեմբերի 30-ին ՀՀ Գեղարքունիքի մարզի Շորժայի գյուղապետարանում: Ինչպես հաղորդում է ecolur-ը, Նախագծի համաձայն` հանքավայրը ձգվում է Սևանա լճի ամբողջ հյուսիս-արևելյան ափով եւ գտնվում է Սևանա լճի մակարդակից մոտ 250 մ բարձրության վրա: Հանքավայրը մոտ է «Սևան» ազգային պարկին:
Հանքավայրի շահագործումը տեղի է ունենալու փուլերով: Առաջին փուլը տևելու է 50 տարի: Բացվելու է երեք հանքային տեղամաս, որոնց ընդհանուր տարածքը կազմում է մոտ 120 հա: Տարեկան արդյունահանվելու է 120.0 հազար տոննա հանքաքար: Նախագծի համաձայն` շահագործման ավարտից հետո կատարվելու է միայն բացահանքերի հատակների վերջնական հարթեցում 1.7 հա մակերեսով: Ինչպես գրում է ecolur-ը, հարց է մնում, թե ինչ է լինելու 120 հեկտարանոց բաց հանքերի տարածքը, որ հարթեցվելու է միայն 1,7 հա տարածքը:
Բացհանքի փոշու գումարային արտանետումների ծավալը կազմելու է տարեկան 4,04 տոննա:
2009-ի նախագծում այդ հանքավայրը կոչվում էր դունիտ-պերիդոտիտների հանքավայր եւ շահագործվում էր միևնույն «Գեգամետ պլյուս» ընկերության կողմից: Ենթադրվում էր, որ պետք է արտադրվեն հրակայուն աղյուսներ: Եւ այն ժամանակ, և հիմա նախագծում ոչ մի խոսք չկա Սևանա լճի վրա հանքավայրի ազդեցության մասին: 2009թ. նախագիծը դիմադրության հանդիպեց ոչ միայն հասարակայնության կողմից, այլև Սևանա լճի պահպանության փորձագիտական հանձնաժողովի կողմից, որը մերժեց նախագիծը:
