«Այդ օլիգարխներից շատերը ոչ մի կապ չունեն մեր կուսակցության հետ». ՀՀԿ-ական պատգամավոր

«Վարչապետը շատ ճիշտ է ասել, եթե այդ ճշմարտությունը պահպանվի: Պետք է մենաշնորհներին վերջ տրվի, պետք է թույլ տրվի, որպեսզի նրանք, ովքեր ինչ-որ բան են ուզում ներկրել կամ արտահանել, առանց խոչընդոտների այդ գործընթացներն իրականացնեն»,- այսօր ԱԺ-ում լրագրողների հետ զրույցում հայտարարեց ԱԺ ՀՀԿ-ական պատգամավոր Համլետ Հարությունյանը` մեկնաբանելով վարչապետ Կարեն Կարապետյանի հայտարարությունը, որ այսուհետ ցանկացածը կարող է ներկրումներ իրականացնել:

Ըստ նրա` Հայաստանի 25 տարվա պետականության ընթացում շատ բաներ են եղել, շատ բաներ են փոխվել, որ կամաց-կամաց հասել ենք այս հանգրվանին, և սրանից հետո էլ այդ փոփոխությունները կլինեն: Պատգամավորը հիշեցրեց հայտնի ֆիլմից թևավոր դարձած խոսքը` «Մոսկվան մի օրում չի կառուցվել»: Համլետ  Հարությունյանի խոսքով` այդ բացթողումները ոչ մեկը չի ժխտում, որ Հայաստանում օլիգարխիկ համակարգ կա՝ ոչ մեկը չի ժխտում, որ մենաշնորհներ կան, և վարչապետն իր պատասխանով հաստատեց՝ կա մենաշնորհային ինչ-որ համակարգ, որը պետք է վերացնել:

168.am-ի հարցին, թե նույն ՀՀԿ-ականնե՞րը չեն օլիգարխիկ համակարգի մասնակից, Հ. Հարությունյանը պատասխանեց.

«Դուք պրովոկացիոն հարց եք տալիս: Ես չգիտեմ, այդ օլիգարխներից շատերը ոչ մի կապ չունեն մեր կուսակցության հետ: Ես` որպես անհատ անձնավորություն, ՀՀԿ անդամ, կատեգորիկ դեմ եմ բոլոր անարդարություններին, անձամբ ինքս թույլ չեմ տվել որևէ օրինազանցություն և դատապարտում եմ նույն օլիգարխներին` անկախ իրենց կուսակցական պատկանելությունից, որովհետև դա առաջին հերթին՝ վնասում է ինձ և իմ նմաններին»:

Կարդացեք նաև

Թե ո՞ւմ հովանու ներքո են գործել և գործում օլիգարխները`  Համլետ Հարությունյանը հարցը ճիշտ չհամարեց: Նրա կարծիքով` բոլոր երկրներում էլ այդ պրոցեսները զարգանում են առանց հովանավորության, և դա նույնն է թե՝ մի հանցագործի ասեք՝ ում հովանավորությամբ է այդ զանցանքը կատարել:

«Վայրի կապիտալիզմի ժամանակաշրջանում նույն գործընթացները եղել են` և՛ ԱՄՆ-ում, և՛ Անգլիայում, և՛ Գերմանիայում: Կապիտալի նախնական կուտակումը հիմնականում հանցավոր ճանապարհով է լինում,- ասաց Հ.Հարությունյանը` օրինակ բերելով Ֆորդին, որ երբեք չէր խոսում իր առաջին միլիոնի ծագման մասին, և շարունակեց,- Եթե Դուք զարմանում եք, թե մեզ մոտ ինչո՞ւ է այս իրավիճակը, ապա դուք սխալվում եք, որովհետև այս իրավիճակն ավելի ահավոր ձևերով եղել է մյուս կապիտալիստական երկրներում: Մարդիկ, որ հացի կարոտ էին, որոնք երկրորդ դասարանի կրթություն ունեին, միանգամից հարստացան: Այդ կապիտալի նախնական տեսակն իր հետ առաջ է բերում հանցավոր գործունեություն, որովհետև դրանց տերերից շատերը նույնիսկ չգիտեին, որ դա հանցավոր գործությունեություն է: Բայց դա կամաց-կամաց գնում է, զուլալվում, դառնում է իրական կապիտալիզմ, մենք մի 25 տարի էլ պետք է ապրենք, որ այդ կլասիկ կապիտալիստական կարգերը մեզ մոտ հաստատվեն: Էլի կլինի օլիգարխիա, էլի կլինի հովանավորչություն, էլի կլինի մենաշնորհ, բայց դրա չափերի մասին պետք է խոսենք»,- ասաց նա:

Տեսանյութեր

Լրահոս