Ջոն Քերին շատ է ցանկանում այցելել Հարավային Կովկաս. Մորնինգսթար
Ադրբեջանական Turan լրատվական գործակալության փոխանցմամբ՝ ԱՄՆ պետքարտուղար Ջոն Քերին մտադիր է այցելել Հարավային Կովկաս, սակայն այցի ստույգ ժամկետը դեռ հայտնի չէ: Այս մասին երեկ լրագրողների հետ զրույցում հայտարարել է Ադրբեջանում ԱՄՆ դեսպան Ռիչարդ Մորնինգսթարը:
Պատասխանելով Հարավային Կովկաս Ջոն Քերիի հնարավոր այցի մասին հարցին՝ Մորնինգսթարը հայտարարել է. «Նախորդ շաբաթ ես Վաշինգտոնում էի և հանդիպում եմ ունեցել պետքարտուղար Ջոն Քերիի հետ: Նա շատ է ցանկանում այցելել Հարավային Կովկաս, սակայն դեռ հայտնի չէ, թե երբ տեղի կունենա այդ այցը»:
Հիշեցնենք, որ Վրաստանի եվրաինտեգրման հարցերով պետնախարար Ալեքսեյ Պետրիաշվիլին սրանից առաջ հայտարարել էր, թե Ջոն Քերին Վրաստան կժամանի մինչև գարնան ավարտ:
