Թրամփի՝ Ուկրաինայի կարգավորման պլանն առաջ չի ընթանում․ հարակից ռեգիոններում առկա միտումները կշարունակվեն․ վերլուծաբան

ԱՄՆ նախագահ Դոնալդ Թրամփի նախաձեռնած կարգավորման պլանի շուրջ քննարկումները կարծես փակուղի են մտնում։

Վլադիմիր Պուտինն ԱՄՆ նախագահի հատուկ բանագնաց Սթիվ Ուիթքոֆի և Դոնալդ Թրամփի փեսա Ջարեդ Քուշների հետ Կրեմլում հանդիպելուց երկու օր անց կոշտ հայտարարությամբ է հանդես եկել և ասել՝ Ռուսաստանը կա՛մ ռազմական, կա՛մ այլ ճանապարհով ամբողջությամբ կվերցնի Ուկրաինայի Դոնեցկի և Լուգանսկի մարզերը, այսինքն՝ ամբողջ Դոնբասը: Ռուսաստանի նախագահն ընդգծել Է՝ ուկրաինական զորքը ստիպված կլինի դուրս գալ այդ տարածքներից:

«Ամեն ինչ հանգում է դրան։ Կա՛մ մենք ազատագրում ենք այս տարածքները զենքի ուժով, կա՛մ ուկրաինական զորքերը լքում են այս տարածքները և դադարեցնում այնտեղ կռվելը»,- ասել է Պուտինը:

Նա, սակայն, Կրեմլի հանդիպումը «շատ օգտակար» է անվանել՝ տեղեկացնելով, որ հանդիպման ժամանակ հերթով դիտարկել են ամերիկյան բոլոր՝ 27 առաջարկները, որոնք ներկայացված էին չորս փաթեթով: Դրանք, ըստ նրա, հիմնված էին Ալյասկայի պայմանավորվածությունների վրա, և որոշ հարցերի Մոսկվան համաձայնել է: ՌԴ նախագահը նաև ասել է, որ խնդրի կարգավորումը բարդ է, իսկ Եվրոպան պետք է նպաստի գործընթացին, ոչ թե խոչընդոտի:

ԱՄՆ նախագահ Դոնալդ Թրամփն էլ հայտարարել է, որ Ուկրաինայի խաղաղության բանակցությունների ուղին դեռ հստակ չէ՝ չնայած Ռուսաստանի նախագահ Վլադիմիր Պուտինի և ամերիկյան պատվիրակության միջև տեղի ունեցած «բավականին լավ» քննարկումներին։ Թրամփը լրագրողներին ասել է, որ ԱՄՆ հատուկ բանագնաց Սթիվ Ուիթքոֆը և իր փեսան՝ Ջարեդ Քուշները, տեղեկացրել են իրեն բանակցությունների մասին և ասել, որ Պուտինից ստացած իրենց տպավորությունն այն է, որ «նա կցանկանար գործարք կնքել»։ Զելենսկին էլ հայտարարել է, թե Ռուսաստանի նկատմամբ ճնշումները պետք է սաստկացնել։

Ռուս վերլուծաբան Ալեքսանդր Խրամչիխինը 168.am-ի հետ զրույցում ասաց, որ, կարելի է ասել՝ այս կարգավորման պլանի շուրջ քննարկումների առաջին փուլը չհաջողվեց։

Նրա խոսքով՝ պատճառը եվրոպական մայրցամաքում գոյություն ունեցող բարդ շահերն են և Եվրոպայի կողմից կարգավորելու, ՌԴ շահերը որոշ առումով հաշվի առնելու ցանկության բացակայությունը։

Խրամչիխինն այն համոզմանն է, որ Եվրոպան ցանկանում է պարտության մատնել Ռուսաստանին, ինչն անիրատեսական նպատակ է։

«Հենց սա է նպատակը, որ Եվրոպան թույլ չի տալիս զարգացնել այն երկխոսությունը, այն առաջարկները, որոնք Թրամփի վարչակազմն է անում։ Թրամփի վարչակազմը հայտնվել է բավականին բարդ իրադրությունում, անընդհատ դիրքորոշումներ են փոխվում, փորձում են ճնշել մի փուլում՝ Ուկրաինային, հետո սկսում են սուր հայտարարություններ անել ՌԴ-ի հասցեին։ Երբ չկա փոխընդունելի կարգավորման պլան, կա պատերազմ ու սպառնալիքներ, որ Ուկրաինան ու Եվրոպան էլ ավելի են սպառազինվելու, Ռուսաստանին չի մնում այլ ելք, քան իր կողմից սուր հայտարարություններով հանդես գալ և հայտարարել, թե որոնք են պլանները։ Բնականաբար, պատերազմ վարող կողմերի ծրագիրը առաջ գնալն է, և այստեղ որևէ նորություն չկա»,- ասաց նա։

Այս ամենը, նրա կարծիքով, հարակից ռեգիոնների համար նշանակում է, որ եթե կար փոքր հույս, որ կարող է ինչ որ գործարք լինել, ապա այն առնվազն հետաձգվում է։

«Սա նշանակվում է, որ այլ ռեգիոններում աշխարհաքաղաքական ստատուս-քվոն, ներկայիս միտումները կպահպանվեն, Եվրոպան կշարունակի իր ակտիվ քաղաքականությունը, որը միտված է ՌԴ ազդեցությունը նվազեցնելուն և Եվրոպայի ներկայությունն ու շահերն ընդլայնելուն»,- ասաց նա։